Lotpa warmin qhepata qhawarisqa

LOTQA familiantinmi Abrahanwan kuska Canaán suyupi tiyaran. Huk p’unchaymi Abrahán Lotta niran: ‘Kaypi allpaqa manan aypanchu uywanchiskunapaq. Ama hina kaspa t’aqakusun. Kay ladoman riqtiykin ñoqaqa haqay ladoman risaq,’ nispa.

Allpata qhawarispan Lotqa rikusqa suyupi allin allpata, uywankunapaq askha q’achuyoq askha unuyoq kaqta. Jordán Distriton karan. Chaymanmi Lotqa familiantin uywakunantin astakuran. Sodoma llaqtapitaq wasita ruwakuranku.

Sodoma llaqtapi runakunaqa sinchi millaymi karanku. Chaymi Lotta llakichiran, payqa chanin runan karan. Diospas anchatan phiñakuran runakunaq millay ruwasqanwan. Iskay angelkunawanmi Diosqa Lotman willachiran Sodoma Gomorra llaqtakunapi runakunata millay kasqankumanta wañuchinanta.

Angelkunan Lotta niran: ‘¡Usqhayta lloqsiy kaymanta, warmiykita iskaynin ususiykikunatawan pusarikuspa!,’ nispa. Lotpas familianpas mana usqhay lloqsiqtinkun, angelkuna makinkumanta hap’ispa llaqtamanta horqoranku. Huknin angelmi niran: ‘¡Ayqekuychis! Aman qhepata qhawarinkichischu. Orqokunaman ayqeychis mana wañunaykichispaq,’ nispa.

Lotpas iskaynin ususinkunapas kasukuspan Sodoma llaqtamanta lloqsiranku. Manan pisillatapas sayarankuchu, nitaq qhepankutapas qhawarirankuchu. Lotpa warminmi ichaqa mana kasukuranchu. Sodoma llaqtamanta manaraq karuta lloqsishaqtinkun qhepanta qhawariran. Chaymi Lotpa warminqa rumi kachiman tukuran. ¿Rikushankichu kay dibujopi?

Chaymantaqa kaytan yachanchis: Diosqa qespichinmi kasukuqkunata, mana kasukuqkunan ichaqa wañunku.