Ama qonqaychu Lotpa esposanwan pasasqanta

Lotqa tion Abrahanwanmi Canaán llaqtapi tiyarqan. Iskayninkupas askha uywakunayoqmi kapurqanku, chaymi campo mana ayparqanchu. Jinan Abrahanqa Lot-ta nirqan: “Manañan iskayninchispaq campo aypanñachu. Ajllakuy maymanchus rinaykita, jinan noqaqa juj kaq ladoman risaq”, nispa. Abrahanqa sumaq runan karqan chayta ruwaspaqa ¿riki?

Lotpa qhawarisqan jallp’aqa munaymi karqan, askha unuyoq q’omer pampa. Chayqa Sodoma llaqtaq qayllanpin karqan, jinan chayman familianwan ripurqan. Chay qhepamantaq Sodoma llaqtapi tiyapurqan.

Sodoma llaqtawan Gomorra llaqtawanqa chimpallantinmi karqanku, chaypi tiyaq runakunaqa sinchi millaykunatan ruwarqanku. Chaymi Diosqa chay llaqtakunata thunipunanpaq decidikurqan. Ichaqa salvayta munarqan Lot-tapas familiantapas, jinan iskay angelkunata kachamurqan paykunata kayta ninanpaq: “¡Usqhayta kay llaqtamanta lloqsiychis! ¡Jehová Diosmi thuninqa!”, nispa.

Lotqa manan usqhaychu lloqsirqan. Chaymi angelkunaqa Lot-tapas esposantapas iskaynin ususinkunatapas makinkumanta aysarikuspa phawaylla llaqtamanta orqorqanku. Nirqankutaq: “¡Ayqekuychis mana wañunaykichispaq, aman qhepaykichistaqa qhawarikamunkichischu, mana chayqa wañunkichismi!”, nispa.

Zóar llaqtaman chayaqtinkun Jehová Diosqa azufreyoq ninata Sodoma, Gomorra llaqtakunaman parachimurqan. Lotpa esposanmi ichaqa Jehová Diosta mana kasukuspa qhepa ladota qhawarirqan, jinan kachi qaqaman tukurapurqan. Ichaqa Lotpas ususinkunapas kasukurqankun, chaymi salvakurqanku, Lotpa esposan mana kasukusqanmantaqa llakikurqankuchá. Chaywanmi allinta yachanchis Diosta kasukuyqa ancha importante kasqanta.