José wayqenkunata wateqayman churan

JOSEQA yachaytan munan chunkantin wayqenkuna ñawpaq hina millayraqchu kanku icha manachu, chayta. Chaymi paykunata nin: ‘Qankunaqa llaqtayku qhamiyaqmi hamunkichis. Suyuykupi ima mana allin kasqanta yachanaykichispaq,’ nispa.

‘Manan, manan chhaynachu,’ ninkun paykunaqa. ‘Honrado runakunan kayku. Llapaykun wayqentin kayku. Chunka iskayniyoqmi karayku. Huk wayqeykun manaña kapunchu, sullk’aykutaqmi taytaykuwan wasipi kashan’.

Rimasqankuta mana creeqmanmi tukun Joseqa. Simeón sutiyoq wayqenkutan carcelpi qhepachin, wakintataq mikhuyta qospa wasinkuman kachapun. Ichaqa kaytan nin: ‘Kutimuspaqa pusamunkichismi sullk’a wayqeykichista,’ nispa.

Canaanpi wasinkuman kutispan, wayqenkunaqa taytanku Jacobman willanku Egipto suyupi imaymana sucedesqanta. Jacobqa anchatan llakikun. ‘José manan rikhurinpunchu, manallataq Simeonpas. Manan Benjamín churiyqa qankunawan rinmanchu,’ nispan waqan. Mikhunanku pisiyaqtinmi ichaqa, manaña hark’ayta atinchu Benjaminpa rinanta, pay rillaqtinmi mikhunata apamunqaku.

Joseqa rikunmi wayqenkunaq kutimusqanta. Kusikunmi sullk’a wayqen Benjaminta rikuspa. Manan mayqenninkupas yachanchu kay ancha respetana runa wayqenku José kasqanta. José kunanqa 10 wayqenkunata wateqayman churan.

Joseqa wayqenkunaq costalninmanmi kamachinkunawan mikhunata hunt’achin. Mana rikushaqtinkutaq Benjaminpa costalninman qolqemanta copanta churachiran. Ripusqanku qhepamanmi Joseqa kamachinkunata nin paykunaman aypananpaq. Paykunaman aypaspan Josepa kamachinkunaqa ninku: ‘¿Ima raykun suwakamunkichis patronniykuq qolqemanta copanta?,’ nispa.

‘Manan suwakamuykuchu copantaqa. Mayqenniykuq costalninpipas tarinkichis chayqa, wañuchiychis chay runata,’ nispan wayqenkunaqa kutichinku.

Chaymi Josepa kamachinkunaqa llapankuq costalninta maskhanku, Benjaminpa costalninpitaq tarinku Josepa copanta, kaypi rikusqayki hina. Josepa kamachinkunan ninku: ‘Llapaykichis ripuychis, Benjaminllan ñoqaykuwan kutinqa,’ nispa. ¿Imatan ruwanqaku chunka wayqenkuna?

Llapankun Benjaminwan kutinku Josepa wasinman. José wayqenkunata nin: ‘Llapaykichis kutipuychis wasiykichisman, Benjaminllan kaypi qhepanqa kamachiy hina,’ nispa.

Wayqen Judá kayta nin: ‘Waynawan mana kutiqtiyqa, waynata mana rikuspan taytayqa wañukapunqa anchata munakusqan rayku. Chay rayku ama hina kaspa, ñoqa qhepasaq kamachiyki hina, sullk’aytaq kutipullachun taytayman,’ nispa.

Chaywanmi Joseqa reparan wayqenkuna allin runaman tukupusqankuta. Manañan ñawpaq hina mana munakuyniyoqchu kanku. Kunanqa yachasun imatan José ruwan.