Mana manchakuq runa

QHAWARIY kay waynamanta asikuq runakunata. ¿Pin kay wayna? Jeremiasmi, payqa Diospa allin reqsisqa profetanmi.

Kamachiq Josías idolokuna ñut’usqan qhepallamanmi Jehová Diosqa Jeremiasta akllaran profeta kananpaq. Paymi ichaqa niran, manan atiymanchu profeta kayta, waynallaraqmi kani, nispa. Ñoqan yanapasayki ninmi Jehová Dios.

Jeremiasmi israelitakunata nin, mana allin ruwasqankuta saqenankupaq. ‘Israelitakunaq yupaychasqan dioskunaqa pantasqa dioskunan,’ ninmi. Ichaqa askha israelitakunan chay idolokuna yupaychayta munanku, manan cheqaq Jehová Diostachu. Huchallikusqankumanta Diospa muchuchinanta willaqtinmi, paykunaqa Jeremiasmanta asikunku.

Unay watakuna qhepatan Josiasqa wañun, kinsa killa qhepamantaq churin Joaquim kamachin. Jeremiasqa yapa yapamantan llaqtapi runakunata nin: ‘Mana kasukuqtiykichisqa Jerusalenmi thunichisqa kanqa,’ nispa. Sacerdotekunan ichaqa Jeremiasta hap’ispa qaparinku: ‘Jeremiasqa llaqtanchispa contranpin rimashan, wañunanmi,’ nispa.

¿Imatan Jeremías ruwan? ¡Payqa manan manchakunchu! Llapankutan nin: ‘Jehová Diosmi kachamuwan kaykunamanta rimanaypaq. Millay kawsayniykichista mana saqeqtiykichisqa, Jerusalenmi thunichisqa kanqa. Kayta ichaqa yachaychis: Wañuchiwankichis chayqa, mana huchayoq runatan wañuchinkichis,’ nispa.

Jeremiastaqa manan wañuchinkuchu, israelitakunan ichaqa mana saqenkuchu millay kawsayninkuta. Babiloniapi kamachikuq Nabucodonosormi Jerusalenpi runakuna contra maqanakuspa atipan. Chay raykun israelitakuna kamachikuna kapunku. Waranqanpi runakunata Babiloniaman apan. ¡Llakikuwaqchá mana reqsisqayki llaqtaman apasuqtiykikuqa!