Diosmi Jeremiasta kamachirqan predicananpaq

Jehová Diosmi Jeremiasta ajllarqan Judá nacionpi profeta kananpaq. Paymi runakunaman willanan karqan millay ruwayninkuta saqepunankupaq. Jeremiasmi ichaqa nirqan: “Waynallaraqmi kani, manchakunin runaq ñaupanpi rimayta”, nispa. Jinan Diosqa nirqan: “Ama llakikuychu, noqan yanapasayki, noqan yachachisayki imachus ninaykita”, nispa.

Jehová Diosmi Jeremiasta nirqan: “Judá llaqtamanta umallikunata juñuspa paykunaq ñaupaqenpi t’uru p’uyñuta p’akinki, jinaspa ninki: Chhaynatan Diospas Judá nacionta ruwanqa”, nispa. Chayta ruwaqtinmi umallikunaqa sinchita phiñakurqanku, sacerdote Pasjurmi Jeremiasta maqaspa makinkunata chakinkunatapas tablakunawan kanichirqan, jinan Jeremiasqa tutantin mana kuyuriyta atirqanchu. Tutamantanmi Pasjurqa kacharipurqan. Chay qhepamanmi Jeremiasqa nirqan: “Manan aguataniñachu, manañan predicasaqchu”, nispa. Ichaqa allinta piensaykuspan nirqan: “Diospa siminqa nina jinan sonqoypi raurarin, chaymi mana upallakuymanchu”, nispa. Jinaspa runakunaman willashallarqan Diospa nisqanta.

Unay watakuna qhepamanmi mosoq rey Judá nacionta kamachirqan. Sacerdotekuna llulla profetakunan llaqta umalliqkunata nirqanku: “Jeremiasqa wañunanmi”, nispa. Jeremiastaq nirqan: “Wañuchiwaspaykichisqa juchallikunkichismi, noqaqa Jehová Diospa niwasqallantan rimani”, nispa. Jinan umalliqkunaqa nirqanku: “Jeremiasqa manan wañunanchu”, nispa.

Jeremiasqa predicashallarqanmi, jinan umalliqkunapas sinchita phiñakurqanku, jinaspa reyta nirqanku Jeremiasta wañuchinankupaq. Reytaq nirqan: “Ima munasqaykichista paywan ruwaychis”, nispa. Jinan Jeremiasta jatun t’oqoman wijch’uykurqanku, chay t’oqoqa t’uruyoqmi karqan, chaymi Jeremiasqa pisi-pisimanta chinkaykusharqan.

Judá nacionpi juj umalliqpa sutinmi Ébed-Mélec karqan, paymi reyta nirqan: “Umalliqkunan Jeremiasta t’oqoman wijch’uykusqaku, chaypi kaspaqa wañunqan”, nispa. Jinan reyqa kamachirqan: “30 runakunata aparikuspa Jeremiasta orqomuychis”, nispa. Chay qhepamanpas Jeremiasqa mana manchakuspan predicashallarqan. Qanri, ¿munawaqchu pay jina kayta?