Jeremiasqa Jehová Diosmantan rimashallarqan

Mayninpiqa runakunan burlakuwanchis otaq phiñakunku Jehová Diosmanta rimaqtinchis. Chayraykupaschá nisunman: “Manañan Diosmanta rimasaqñachu”, nispa. ¿Hayk’aqllapas chhaynata sientekurqankichu?... Yachasun Jeremiasmanta. Payqa Jehová Diostan munakurqan, ichaqa yaqallan manaña Diosmanta rimapurqanñachu.

Jeremiasqa waynallaraq kashaspan runakunaman willanan karqan mana allin ruwasqankuta saqepunankupaq, chayta ruwananpaqmi Jehová Dios nirqan. Chay ruwayqa sasan karqan, chaymi Jeremiasqa manchakurqan. Hinan Jehová Diosta nirqan: “Sinchi waynallaraqmi kani, manan rimaytapas yachaniraqchu”, nispa. Ichaqa Diosmi nirqan: “Ama manchakuychu. Ñoqan yanapasqayki”, nispa.

Chaymi Jeremiasqa runakunata nirqan: “Mana cambiaqtiykichisqa muchuchisqan kankichis”, nispa. ¿Kasukurqankuchu runakuna?... Manan. Aswanpas runakunaqa phiñakurqankun burlakurqankun, wakinqa wañuchiytaraqmi munarqankupas. ¿Imaynan Jeremías sientekunman karqan?... Payqa manchasqan kasharqan, nirqantaqmi: “Manañan Jehová Diosmanta rimasaqñachu”, nispa. Ichaqa, ¿chaytachu ruwarqan?... Manan. Payqa Jehová Diostan anchata munakurqan chaymi mana atirqanchu ch’inlla kayta. Chayta ruwasqanraykun Jehová Diosqa enemigonkunamanta cuidarqan.

Huk kutinmi millay runakuna huk t’uru p’uytuman Jeremiasta wikch’uykurqanku. Yarqaypi ch’akiypin tarikurqan. Chay runakunaqa chaypi wañunantan munarqanku. Ichaqa Diospa yanapayninwanmi Jeremiastaqa chaymanta horqopurqanku.

Jeremiasqa manchakurqanña chaypas, payqa Jehová Diosmantan rimashallarqan. ¿Imatan chaymanta yachanchis?... Runakunaman Diosmanta rimaqtiykiqa yaqapaschá burlakusunkiku otaq phiñakunqaku. Yaqapaschá p’enqakunki otaq manchakunkiraq. Ichaqa ama hayk’aqpas niychu: “Manañan Diosmanta rimasaqchu”, nispaqa. Diosqa yanapasunkipunin imaynan Jeremiastapas yanaparqan hinata.