Jesús yupaychana wasita ch’uyanchan

JESUSQA sinchi phiñasqan kashan, ¿riki? ¿Ima rayku? Jerusalenpi Diospa yupaychana wasinpi kaq runakunaqa nishu qolqe sonqon kanku. Yupaychana wasiman Diosta yupaychanankupaq hamuq runakunamantan askhata qolqeta suwanku.

¿Rikushankichu kaypi torillokunata, ovejakunata, palomakunatapas? Yupaychana wasipin kay runakunaqa chaykunata vendeshanku. ¿Ima rayku? Diosman sacrificio haywanankupaqmi israelitakunaqa necesitanku animalkunata, palomakunatapas.

Diosmi kamachiran mayqenpas huchallikuspaqa, Diosman ofrendata haywananpaq. Huk kutikunapipas israelitakunaqa ofrendata haywarankun. ¿Maypin tarinkuman ofrenda haywanankupaq animalkunata, palomakunatapas?

Wakinpaqa karanmi animalninkuna haywanankupaq. Askha israelitakunan ichaqa mana animalniyoq karanku. Wakintaq sinchi karupi tiyaspa mana atirankuchu Jerusalenpi yupaychana wasiman apayta. Chay raykun kaypi vendenku animalkunata, palomakunatapas. Kay runakunan ichaqa askha qolqepaq vendenku animalkunata. Chhaynatan runakunamanta qolqeta suwanku. Chaymantapas, manan Dios yupaychana wasipichu vendenanku karan.

Chay ruwasqankun Jesusta phiñachin. Chaymi payqa qolqe churasqanku mesakunata t’ikraspa qolqeta wisñirparin. Waskhamanta ruwasqa hasut’iwanmi animalkunatapas yupaychana wasimanta qarqon. Paloma vendeqkunatan kamachin: ‘¡Horqoychis kaymanta! Taytaypa wasinqa manan qhatuna wasichu,’ nispa.

Jesuspa wakin qatikuqninkunaqa Jerusalén yupaychana wasipin paywan kashanku. Musphanku Jesuspa ruwasqanta rikuspa. Yuyarinkun Bibliapi Diospa Churinmanta nisqanta: ‘Diospa wasinta munakusqanmi nina hinaraq paypi rawrarinqa,’ nispa.

Jerusalenta Pascuaman hamuspan Jesusqa askha milagrokunata ruwan. Chaymantan Jesusqa Judeamanta lloqsispa Samaria llaqtanta Galileaman kutin. Yachasun Samariapi ima sucedesqanta.