¿Yacharankichu?

¿Razonwanchu Jesús nisharan Jerusalén templopi vendeqkunata “suwakuna” nispa?

MATEO libropin nishan: “Jesustaq temploman jaykuspa jawaman qarqomuran chaypi llapa vendeqkunata rantiqkunata ima, qolqe cambiaqkunaq mesankunatapas, paloma vendeqkunaq tiyanankunatapas t’ijrarpariranmi. Jinaspa paykunata niran: ‘Qelqasqan kashan: “Wasiyqa ‘Diosmanta mañakuna wasi’ nisqan kanqa”, nispa; qankunataq ichaqa suwakunaq t’oqonman tukuchipusqankichis’”, nispa (Mat. 21:12, 13).

Apostolkunaq tiemponpi Jerusalén templopi vendeq comerciantekunaqa nishu preciowanmi imatapas vendeqku. Misná libroq nisqanman jinaqa, juj kutinsi iskay palomakunalla valerusqa juj qori denario qolqepaq. Chay tiempopiqa juj qori denario qolqeqa 25 p’unchay llank’asqamanta pagon karan. Diospa kamachisqanman jinaqa wajchakunallan palomataqa jaywananku karan, ichaqa chhayna preciowanqa manan wajchakunapas rantiyta atirankuchu (Lev. 1:14; 5:7; 12:6-8). Vendeqkuna chaykuna ruwasqankuta rikuspan chay tiempopi rabino nisqa Simeón ben Gamalielpas pisiyachipuran sacrificiokunata. Chaywanmi palomakunaqa sinchitapuni bajapuran.

Rikusqanchis jina, razonwanmi Jesusqa chay comerciantekunata nisharan “suwakuna” nispa. Chaymantapas chay runakunaqa ambiciosokuna, runa ch’utiqkuna iman karanku.