Tukuy sonqowan rimay

TUKUY sonqowan rimaqtiykiqa sumaqmi discursoyki kanqa. Allin kaqkunamantaña yachachinki chaypas, uyariqkuna allinta uyarinasuykikupaqqa tukuy sonqowanmi rimamunayki. Manaña chhayna rimaqchu hayk’aqpas karqanki chaypas, atiwaqmi tukuy sonqowan rimayta.

Sonqopas-sonqo rimay. Jesusmi Samaria llaqtayoq warmita nirqan Jehová Diosta yupaychaqkunaqa ‘espiritupi cheqaq-kaypiwan’ yupaychanankuta (Juan 4:24). Paykunaqa Diospa Simin Qelqapi cheqaq-kayman hinapunin yupaychananku anchata agradecekuspa ima, chayman hinataq rimanankupas. Agradecekuqqa maytan munan Jehová Diospa qokuyninkunamanta rimayta, chayqa sut’itan reparakun munakuywan rimasqanpi, uyanpi, makiwan yanapachikuspa rimasqanpipas.

¿Imanaqtintaq wakin discurso qoqkunari mana tukuy sonqowanchu rimamunku Jehová Diosta munakushaspapas, yachachikuyninkunamanta mana iskayashaspapas? Discursota mana sonqonkuman churasqankuraykun. Chaymi allintaña preparakushaspapas mana sonqomantachu rimamunku. Huk iñiqmasinchis Jesucristoq wañusqanmanta rimamushan chayqa, manan rimayllachu rimanan, aswanmi Jehová Diosta Jesustapas anchata agradecekuspa rimanan, chhaynapin rikuchinqa pay kikinpaqpas uyariqkunapaqpas Jesuspa wañusqan ancha allinpuni kasqanta. Yuyarinallantaqmi chay hawa wiñay kawsaypas, mana onqospa kusisqa kawsaypas runakunapaq kananta. Chhaynapin sonqo rurunmantapuni rimamunqa.

Bibliaq nisqan hina, “Esdrasqa allintapunin sonqonta wakichikurqan” Jehová Diospa kamachikuy siminta allinta yachananpaq, hunt’ananpaq, Israel runakunaman yachachinanpaqpas (Esd. 7:10). Hebreo rimaypi “sonqonta wakichikurqan” simiqa “imatapas ruwananpaq hinan sonqonta kallpacharqan, kuyurichirqan” ninantan nin. Ñoqanchispas discursonchista preparasqanchismantapas, imamanta rimamusunchis chaypaq hinan sonqonchista kallpachananchis, chhaynapin tukuy sonqo yachachisunchis Diospa siminta, uyariqkunataq sonqonkuman chayta churanqaku.

Rimasqaykiqa uyariqkunaq allinninpaqmi. Tukuy sonqo rimanaykipaqqa manan iskayanaykichu rimasqaykiqa uyariqniykikunaq allinninpaq kasqanta. Chhaynaqa discursoykita allinta t’aqwisqaykimantapas Jehová Diosmantan mañakunayki chaywan uyariqkunata yanapanaykipaq (Sal. 32:8; Mat. 7:7, 8). Tapukuy: “¿Imaraykun uyarinanku kay discursota? ¿Imaynapin allinninkupaq kanqa? ¿Imaynatan paykunapaq hina allinta sut’inchayman?” nispa.

Tukuy sonqowan rimamunaykipaq hinan discursoykita preparanayki. Manaña uyariqkunaq mana yachasqanku kaqkunamantachu rimamunki chaypas, huk-hinamantan chaykunata willawaq. Sichus discursoyki uyariqkunata kallpachanqa Jehová Diosman astawan asuykunankupaq, qosqankunamanta agradecekunankupaq, kay kawsaypi sasachakuykunata atipanankupaq, otaq aswan allinta predicanankupaqpas chayqa, tukuy sonqowan rimamunaykipaq hinan kashan.

Escuelapi tukuy sonqowan leemunaykipaqqa manan simikunata allinta t’oqyachiyllamantachu kanqa. Allintan t’aqwinayki leemunayki qelqata. Bibliamanta leemunki chayqa, allintaraq versiculokunata t’aqwiy, chhaynapin allinta entiendenki. Chaymantataq tapukuy: “¿Imaynapin ñoqata uyariqkunatapas kay texto yanapanqa?” nispa; chayta reparanankupaq hinataq tukuy sonqowan leemuy.

Predicacionman lloqsinaykipaq preparakushanki chayqa, yuyaykuy imamanta rimanaykita, mayqen textokuna qhawachinaykitapas. Yuyaymanay imamanta runakuna llakikusqankuta. Ima noticiakunachus uyarikushan, ima sasachakuykunapichus kashanku chaypaq hina textokunata akllay, chhaynapin anchata munanki Diospa Simin Qelqawan paykuna yanapayta, tukuy sonqowantaq predicankipas.

Rawrashaq sonqowan rimay. Tukuy sonqowan rimasqaykiqa sut’itan reparakunan imayna kunkawan rimasqaykipi uyaykipipas. Chaymi mana iskayaspa rimanayki, ichaqa ama “uyariwanaykichispunin” niq hinachu.

Chaypaqmi yachanayki imayna ruwanata hinalla rimayta. Wakinqa tukuy sonqowan rimayta munaspankun nishu kallpawan uyarichikuq hina rimanku, chhaynata rimaspan ichaqa kikinkuta nishuta qhawarichikunku, manataq allintachu reparakun imamanta rimasqanku. Wakintaq manchali kanku, chaymi kallpachana rawrashaq sonqowan rimamunankupaq.

Uyariqkunata allinta qhawarispa tukuy sonqowan rimaqtiykiqa, paykunapas tukuy sonqowanmi uyarisunkikuman. Ñawpaq tiempopin kawsarqan Apolos, paymi tukuy sonqowan rimaq karqan, kusa rimaqtaq karqanpas. Sichus qanpas rawrashaq sonqowan rimanki chayqa, uyariqniykikunan kallpachakunqaku discursoykiman hina ruwanankupaq (Hech. 18:24, 25; Rom. 12:11).

Imamanta yachachishanki chayman hina rimay. Qallariymantapacha tukukuykama tukuy sonqowan rimaqtiykiqa sayk’uchinkin uyariqkunata, manataqmi ima ruwanankupaqpas kallpachakunqakuchu. Chhaynaqa discursoykita preparashaspaqa ama kallpachanapaq kaqllatachu churay. Amallataq rimaychu manapas imapas qokusunkimanchu hinaqa. Sichus tukuy yuyaywan akllanki imakunamanta rimanaykipaq chayqa, llapantachá qhawarinki tukuy sonqowan rimanapaq hinata; chaywanpas wakillantan tukuy sonqowanpuni rimanayki, chaykunallatataqmi llapan discursoykipi sut’ita reparachinayki.

Allinnin yachachikuykunatan astawanqa tukuy sonqowan rimanayki. Chaykunaqa discursoyki sut’i reparaymi kanan, chaykunaman chayaspaykin astawan uyariqkunata kallpachanayki ima ruwanankupaqpas. Chaypaqmi imatapas allinta entiendechispa reparachinayki chay ruway allinninkupaq kasqanta, chhaynapin sonqonkuman chayanki. Chay hinaqa, kaypi yachasqanchis hina, manan tukuy imatachu tukuy sonqowanqa rimana, aswanpas mayqen yachachikuykunachus chaypaq hina kashan chaykunallatan.