Textokunata allinta reparachispa leey

DISCURSOTA qoshaspapas otaq maypiña kashaspapas Diospa munayninmanta runakunaman willaspaqa Diospa Simin Qelqaq nisqanman hinan willanayki. Chaypaqqa Bibliamantan allinta leenayki kanqa.

Sonqomanta leey. Salmo 37:11 textopin willashan kay pachantinpi thak kawsay kananmanta, chaytaqa kusikuywanmi leenayki. Apocalipsis 21:4 textopin willashan ñak’ariypas wañuypas chinkachisqa kananmanta, chayta leespaykiqa ancha agradecekuywanmi leenayki. Apocalipsis 18:2, 4, 5 textopitaq willashan sinchi huchayoq ‘Hatun Babiloniamanta’ usqhaylla lloqsipuna kasqanta, chayta leenayki kaqtinqa usqhachiq hinan leenayki. Sonqomantaña leenayki chaypas, manan nishuta kunkaykita huk-hinayachinaykichu, aswanpas imamantachus chay texto rimashan imapaqtaqchus leeshanki chayman hinallan kanan.

Wakin simikunallata allinta reparachiy. Leesqayki textopi wakin simikunallachus sut’inchan imamanta rimasqaykita chayqa, chaykunallatan allinta reparachinayki. Sichus Mateo 6:33 textota leeshanki ‘Diospa qhapaqsuyunta ñawpaqta maskhay’ imachus kasqanta sut’inchanaykipaq chayqa, manan ‘chanin-kayninta’ ‘tukuy chaykunata’ nisqa simikunatachu allinta reparachinayki kanqa.

Sichus Predicayta Yachanapaq Huñunakuypi Mateo 28:19 textota leespa uyariqkunata kallpachayta munanki estudiokunata qallarinankupaq chayqa, “runakunata yachachimuychis, yachachisqaykuna kanankupaq” nisqa simitan allinta reparachinayki kanqa. Ichaqa wak llaqtayoqkunaman predicana kasqanta rikuchiyta munanki otaq maypichus predicaqkunata necesitakushan chaypi yanapakamunankupaq kallpachayta munanki chayqa, “llapa suyu runakunata yachachimuychis” nisqa simitan astawan reparachinayki.

Runakunaq tapukusqanta kutichinapaq otaq mayqen sasa yachachikuytapas sut’inchanapaqqa Bibliaq nisqantapunin qhawachinchis. Sichus textokunapi simikunata kaq kunkallawan leenki chayqa, uyariqniykikunaqa manan entiendenqakuchu imapaq chay texto leesqaykita, sut’i entiendeyña qanpaq kashaqtinpas.

Sichus Juan 3:16 textopi wiñay kawsanapaq imata ruwananmanta rikuchispa “pipas paypi iñiqqa” nisqata reparachinayki. Hinallataq, wiñay kawsayta aypay atisqanchismanta rimaspa “wiñay kawsayniyoq kananpaq” nisqata reparachinki. Santiago 2:24 textopin willashan runaqa ruwasqanwanpuni iñiyniyoq kasqanta rikuchinanmanta, chayta sut’ita entiendechinaykipaqqa manan “chaninchasqa” nisqa simitachu astawanqa reparachinayki, aswanpas “ruwasqankunapiwan” nisqa simitan.

Yachasunchis Romanos 15:7-13 textoq nisqanmanta. Chaytan apóstol Pablo qelqarqan iñiq judiokunaman mana judiokunamanpas. Chaypin willarqan Cristoq predicayninqa judiokunapaq mana judiokunapaqpas allin kasqanmanta, chhaynapi “Diospa khuyapayasqan hawa mana judío runakunapas Diosta yupaychanankupaq”. Pabloqa Diospa Simin Qelqamanta tawa willakuykunatan qelqarqan, chhaynapi mana judío runakunapas Diospa chaskisqan kasqankuta rikuchinanpaq. ¿Mayqen simikunatan allinta reparachiwaq chay textokunata leespayki? Allintan reparachiwaq 9, 10 versiculokunapi “suyukuna” nisqata, 11 versiculopi “llapa suyukuna” “llapa llaqtakuna” nisqa simikunata, 12 versiculopitaq “suyukunata” “suyukunan” nisqa simikunata. Chaykunata allinta reparachinki leespa chayqa, sut’i entiendeymi kanqa Pabloq willasqan.

¿Imaynatan simikunata sut’ita reparachiwaq? Imaymananmantan chaytaqa ruwasunman, qatiqnin parrafokunapi wakinmanta yachasun. Ichaqa manaraq huk-hinamanta ruwashaspaykiqa, allinta qhawariy imamantachus leenayki texto rimasqanta, hinallataq pikunamanchus maypichus discursoykita qonaykitapas.

Ama kaq kunkallawanchu leey. Wakin simikunataqa kunkawan leey wakintataq mana, hinallataq kunkaykita rakhuyachispa otaq ñañuyachispa. Chaymantapas wakin simikunataqa allillamanta leespan allinta reparachiwaq.

Huk chhikanta samariy. Chaytaqa ruwawaq manaraq reparachinayki simikunata leeshaspa otaq leesqayki qhepatañan. Manaraq leeshaspa huk chhikanta samarinki chayqa, uyariqniykikunatan kallpachanqa makilla uyarinankupaq, leesqayki qhepaman samariqtiykitaqmi aswan allinta uyariqniykikunaman chayanqa leesqayki. Ichaqa sinchita sama-samarispa leenki chayqa, manan leesqayki textokunapi wakin simikunata reparachinkichu.

Wakmanta leey. Imatachus reparachiyta munanki chaytan wakmanta leewaq allinta entiendenankupaq. Ichaqa aswan allinmi kanman llapa versiculota leeyta tukuspaña chay simikunata wakmanta reparachiy.

Cuerpoykiwan yanapachikuy. Uyaykiwan, makiykiwan, llapa cuerpoykiwanpas yanapachiskuspan mayqen simitapas allinta reparachiwaq.

Kunkaykita ñañuyachispa rakhuyachispa leey. Allin yuyaywanmi chaytaqa ruwana, astawanqa burlakuq hina imatapas leena kaqtin.

¿Imatan ruwanayki textokunata mana allinta leeqtinku? Wasiyoq huk textota leespaqa manapaschá mayqen simitapas allintachu reparachinqa otaq kasqan kunkallawan leenqa. Chhayna kaqtinqa, ¿imatan ruwawaq? Sut’inchawaqmi chay textoq ima nisqanta imapaqchus allin kasqantawan, hinaspa wakmanta qhawarichiwaq chay textopi allin kaq simikunata.