Parlarikushawaq hinalla rimay

RUNAKUNAQA sumaqtan parlata tupachinku amigonkunawan, chaymi imachus yuyayninkuman hamusqanman hinalla rimanku. Rimaysapaña otaq pisi rimaqña kanku chaypas, imayna parla tupachisqankuqa sumaq uyarinapaq hinan.

Ichaqa mana reqsisqanchis runawan rimasunman chayqa, manan allinchu kanman confianza amigonchistapas rimapayashasunman hinata rimayqa. Wakin llaqtakunapiqa mana reqsisqankutaqa ancha respetowanmi rimapayayta qallarinku. Chaywanpas, chay qhepamanqa allinmi kanman amigonchiskunata hina sumaqta rimapayay, ichaqa allin yuyaywanmi chayta ruwana.

Discursota qoshaspanchispas allin yuyaywanmi rimananchis. Amigonchiskunawan hina nishu confianzawan rimasunman chayqa, mana allinpaqmi qhawarichisunman huñunakuyninchista imatachus nisqanchistapas. Wakin llaqtakunapiqa kanmi kurak runakunata, profesorkunata, autoridadkunata, tayta-mamakunatapas imayna simikunawan ninankupaq (qhaway Hechos 7:2; 13:16). Hinallataq confianza amigonkuta otaq qosankuta, esposankuta imayna ninankupaqpas. Chayraykun discursota qospaqa respetowan rimana, ichaqa manan mana asirikuyta yachaq runa hinachu.

¿Imaraykun wakin discurso qoqkuna mana pisillatapas asirikunkuchu discursota qoshaspanku? Chayqa kanman imachus qelqasqa kasqanman hina iman kaqllata rimayta munasqankuraykun. Manataq imayna rimasqanchisman hinachu qelqanchis chayqa, sasan kanman qelqasqata leespa piwanpas parlarikushawaq hina rimayqa. Discurso qoqkunaqa qelqakunata t’aqwispan preparanku discursonkuta, yaqa llapan discursopaqmi chaskinku huk qelqata. Chhaynaña kaqtinpas manan iman kaqtachu rimanayki qelqakunapi kaq simikunataqa, mana chayqa rimasqaykin mana sumaqchu uyarikunqa. Chayrayku, discursota qoshaspaykiqa imaynatachus rimanki chayman hinalla rimay, amataq sasa entiendekuqtachu.

Chaymantapas discurso qoqkunaqa yachanankun mayninpi usqhaylla otaq allillamanta rimayta. Chayta mana ruwaqkunaqa huk-hinallamantan rimanku. Piwanpas parlarishaspanchisqa mayninpin huk chhikan usqhayta rimanchis mayninpitaq allillamanta. Discursopipas chaytan ruwana.

Askha runakunaman rimaykushaspaykiqa piwanpas parlarikushawaq hinata rimanaykimantapas, aswan kallpawanmi tukuy sonqowan rimanayki, chhaynapi allinta uyarinasuykikupaq.

Predicacionpi imayna rimasqaykipas uyariqkunapaq hina kananpaqqa, yachanaykin maypiña piwanña kashaspapas allin rimayta. Chaypaqqa manan yachaysapakunaq rimaynintaraqchu yachana. Ichaqa yachanaykin respetowan uyarinankupaq hina rimayta, yachakunaykitaqmi chay hina rimayman. Chayta ruwanaykipaqmi yanapasunkiman qatiqninpi kaq yuyaychaykuna, yaqapaschá wakinpi allinyanayki kanman.

1. Imayna rimanata hinapuni rimay, amataq mana allin runakunaq imayna rimasqanta hinaqa rimaychu. Colosenses 3:8 textoq nisqan hina, manan qhelli simikunataqa rimanachu. Chaymantapas amigokunaq otaq familiakunaq rimasqan wakin simikunaqa allinmi kanman rimanapaq.

2. Ama kaq simikunallawanchu yachachikuykunataqa rimay. Ima ninaykipaqpas mayqen simikunachus aswan k’apak kanman chaykunata rimay.

3. Ñawpaqmantaña imakunatachus rimanaykita allinta yuyaykuy, chhaynapi mana wakmanta kuti-kutirispa imamantapas rimanaykipaq.

4. Pisi rimayllapi yuyarinankupaq hina allin yachachikuykunata entiendechiy. Mana chayqa nishu rimasqaykiwanmi chay yachachikuykunata p’ampapuwaq.

5. Ancha respetowan rimay.