Imayna rimasqaykita hinalla rimay

ISKAY UYA runa sumaqta rimaq tukuspa imaymanata willasunkiman chayri, ¿creewaqchu ima nisqantapas? Manan riki. Chhaynaqa imayna rimasqanchisman hinallan rimananchis, amataq hukniraytachu.

Ichaqa manan chaywanqa nishanchis atisqanchisman hinalla rimananchispaqchu. Aswanmi kallpachakunanchis allinta rimanapaq, simikunata allinta t’oqyachinapaq, manataqmi comuntachu rimananchis. Maypiña piwanña kashaspapas repetowanpunin rimananchis, comportakunanchispas. Chaymantapas manan mana asirikuyta yachaq hinachu rimananchis, manataqmi sinchitachu maskhananchis allin qhawarisqa kayta.

Imayna rimasqaykiman hinalla predicay. Predicanaykipaq punkuta takanayki kaqtin otaq pimanpas chimpaykuspayki, ¿khatatataytachu qallarinki? Lliwpas pisillatapas manchakunchismi hukkunawan rimayta, wakinmi ichaqa sinchita sasachakunku, chaymi panta-pantata rimanku, makinkutapas umankutapas manan rimasqankuman hinachu kuyuykachachinku.

¿Imaraykun nishuta sasachakunku? Yaqapaschá imayna qhawarisqa kanankumanta, otaq allinta predicanankumanta nishuta yuyaymanasqankurayku. Allinña chaykunapi yuyaymanay chaypas, manan chayllapichu yuyayninchisqa kanan. Chhaynaqa, ¿imatan ruwanayki predicacionman lloqsinayki kashaqtin manchapakuy hap’isuqtiyki? Allintan preparakunayki, tukuy sonqowantaq Jehová Diosmanta mañakunayki (Hech. 4:29). Hinallataq yuyaymananayki Diospa ancha khuyapayakuq kasqanpi, paymi lliwta waqyamushan Paraisopi qhalilla wiñaypaq kawsanankupaq. Chaymantapas predicasqayki runakunapi interesakuy, paykunaqa maytan necesitashanku allin willakuykuna uyariyta.

Chaymantapas yuyarinaykin, manan llapan runakunachu predicasqanchistaqa chaskikunqaku. Jesustapas wakin runakunaqa manan uyariqpas tukurqankuchu. Chayrayku ama sinchita llakikuychu mana uyarisuqtiykikuqa, aswanpas kallpachakushallay predicaq rinaykipaq (Mat. 24:14). Manaña uyariyta munasunkichu chaypas, paykunaman qayllaykusqaykiqa rimapayawaqpas karqan hinan kanqa. Chaywanmi kasukushanki hunt’ashankitaq Jehová Diospa munayninta. Uyarikuyta munanqaku chayqa, imayna rimasqaykita hinalla sumaqtan rimanayki, paykunaq allinninta maskhayta munaspa.

Predicashaspaykiqa imayna rimasqaykiman hinalla rimay, chhaynapin uyariqniykikuna allinta uyarisunkiku, Bibliamanta willasqaykitapas allintan hap’ikunkuman. Qanlla rimanaykimantaqa, parlarikuq hina tapunakuspa rimay. Sumaq sonqowan rimay, interesakuy uyariqniykipi, agradecekuytaq imatapas nisqasuykimanta. Ichaqa, predicasqayki llaqtapi mana reqsisqawan rimanapaq costumbre kan imayna napaykunapaq, ima nispa parlayta tupachinapaqpas chayqa, chayman hina ruway. Kallpachakuytaq kusikuywan respetowan ima chayta ruwanaykipaq.

Imayna rimasqaykiman hinalla discursota qoy. Pisi runakunallaman rimashanki chayqa, piwanpas parlashawaq hinalla rimay, ichaqa askhaman rimashanki chayqa, allin kallpawanmi rimanayki. Sichus llapan discursoykita umaykipi hap’iyta munanki otaq ruwasqayki qelqapi nishu askhata qelqanki chayqa, sasachakunkichá ima simikunawan rimanaykita akllaspa; chhaynapitaq manaña atinkichu imayna rimasqaykita hina rimayta. Chayrayku, ima simikunawan rimanaykita akllanaykimantaqa, aswan allinmi kanman imamanta rimanaykipaq allinta yuyaykuyniyki.

Discurso qoq imatapas willanaykipaq tapusunki chayqa, ñawpaqmanta preparakuy imayna kutichinaykipaq, ichaqa ama llapanta grabasqata hina umaykipi hap’iychu, amallataq qelqaychu chaymanta leenaykipaqqa. Aswanpas imayna rimasqaykita hinalla tukuy sonqo rimay, chhaynapin huñukuypi kaqkuna sumaqta uyarisunkiku.

Kusa rimaq kanapaq yachachikuykunataqa maychus ruwakunanman hinallan ruwanayki. Simikunata allinta t’oqyachiy, ichaqa ama nishu k’apakta t’oqyachiq hinachu. Cuerpoykiwan yanapachikuy imatapas allinta entiendechinaykipaq, imaynachus imapas kasqanta sut’inchanaykipaqpas, ichaqa ama comunta huk-hinallamantaqa ruwaychu. Wakin yachachikuykunataqa kallpawanmi rimanayki, ichaqa ama qapariq hinaqa. Mayninpiqa tukuy sonqowanmi imatapas ninayki kanqa, ichaqa manan hawapi-ukhupi sonqoyoq hinachu ruwanayki. Mayninpitaq kunkaykita ñañuyachispa rakhuyachispa, hinallataq sonqomanta munakuywan ima rimanayki kanqa, ichaqa ama chayta ruwaychu kikiykita reparachikuq hinaqa, mana chayqa uyariqniykikunan huknirayta qhawasunkikuman.

Wakin runakunaqa discursota qoshaspapas, maypiña piwanña kashaspapas k’apaktan rimanku, wakintaq amigonkuwanpas familiankuwanpas rimashankuman hina pitapas rimapayanku. Imayna rimaymanña yachasqa kashanchis chaypas, kallpachakunanchismi tukuy tiempo allintapuni rimananchispaq, comportakunanchispaqpas. Chhaynata ruwanki chayqa, mana sasachakuspallaykin discursokunata qonki.

Sumaqta leey. Leesqayki sumaq kananpaqqa imaymanatan ruwanayki. Ñawpaqtan yachanayki mayqen yachachikuykuna aswan importante kasqanta, imaynatachus chaykuna sut’inchakusqantapas. Manachus chayman hina leenki chayqa, manan allintachu entiendekunqa. Chaymantapas mana reqsisqayki simikunata tarispaqa diccionariopin maskhawaq otaq qheswa simita allin yachaqta tapuwaq. Chaymantataq kunkawan leey kunkaykita ñañuyachispa rakhuyachispa, as allillamanta, usqhayllata, pisi kallpawan allin kallpawan ima; amataq sapanka simipi samaspachu leey. Chhaynata practicay ch’uyata leenaykikama. Allintapuni t’aqwinki leenayki qelqata chayqa, piwanpas parlarishawaq hinan sumaqta leenki.

Hukkunaq qayllanpi leemusqanchis qelqakunaqa yaqa llapanmi Bibliamanta horqosqa. Bibliamanta Allin Yachachiq Kanapaq Escuelapi wakin versiculokunata leemusqanchismantapas leemullanchistaqmi discursota qoshaspa, predicaspapas. Qharikunaqa leemullankutaqmi Qhawaq revistatapas, Biblia Estudianapaq Huñunakuypi qelqatapas, hinallataq kinsa p’unchay huñunakuykunapi wakin discursokunatapas. Bibliapi otaq leemunayki mayqen qelqapipas kashanman wakin runakunaq rimasqanku chayqa, chayman hina leemuy. Allinmi kanman imaynachus paykunaq kunkan kanman karqan chayman hina leey, ichaqa kunkaykita ama nishuta huk-hinayachispalla chayta ruway. Chhaynapin leesqaykiqa sumaqta uyarikunqa.

Sumaqta leemuqkunaqa piwanpas parlashankuman hinallan leemunku, chaymi manaña hukniraytachu uyarikunqa, iñichinapaq hinataqmi kanpas.