Reparachiy imamantachus rimashasqaykita

ALLIN discurso qoqkunaqa huk temallamantan discursonkupi rimanku. Discursopaq preparakushaspankuqa rimananku temallatan allinta t’aqwinku kallpachakunkutaq entiendenankupaq. Discursoqa uyariqkunaq allinninpaq kanqa chaypi yachachikuykunata allinta sut’inchaqtiykin. Allin yachachikuykunata discursoq temanwan tupachispa rimanki chayqa, mana sasachakuspan uyariqkuna chayta yuyarinqaku, ancha allinpaqtaqmi hap’inqakupas.

Wakin temakunapiqa imaymanamantan rimasunman, chayraykun allinta qhawarinayki imamantachus astawan rimanayki kanqa chayta, chaypaqmi qhawariwaq discursoq titulonta. Diospa Gobiernonmanta, Bibliamanta, kawsarimpuymantapas imaymana temakunatan horqokullanmantaq, chaykunan kanman: “Diospa Gobiernonqa cheqaqmi”, “Diospa Gobiernonmi kay pachata paraisoman tukuchipunqa”, “Bibliaqa Diospa yuyaychasqanmi”, “Bibliaqa ancha allinmi kay tiempopi yanapawananchispaq”, “Kawsarimpuyqa kallpachanmi wañuqniyoqkunata”, “Kawsarimpuymanta yachaymi yanapawanchis qatiykachay kaqtin qaqa sayananchispaq”, nisqakuna. Chay temakunataqa sapankatan huk-hinamanta sut’inchana.

Jesusqa Bibliaq imachus teman kasqanmantan astawanqa rimarqan: “Hanaq pacha qhapaqsuyun [“Gobiernon”, NM] sispaykamunña”, nispa (Mat. 4:17). ¿Imaynatan chayta ruwarqan? Diospa Gobiernonmantaqa tawantin Evangeliokunapin rimakun 110 más kutitaraq. Ichaqa Jesusqa manan Diospa Gobiernon nispallachu rimarqan. Payqa yachachikuyninkunawan milagrokuna ruwasqanwan iman sut’ita runakunaman rikuchirqan Diospa Churin Mesías kasqanta, chay Gobiernopi kamachinanpaq Jehová Diospa churasqan kasqantapas. Chaymantapas Jesusqa willarqanmi huk runakunapas chay Gobiernopi paywan kuska kamachimuyta atinankumanta, nirqantaq chaypaq imayna sonqo runa kanankuta. Jesusqa yachachisqanwan milagrokuna ruwasqanwan iman rikuchirqan Diospa Gobiernon runakunapaq imakuna ruwananta. Hinaspapas Diospa espiritunwan millay espiritukunata qarqosqanwanmi rikuchirqan ‘Diospa Gobiernonqa uyariqninkunaman chayamusqanta’ (Luc. 11:20). Qatikuqninkunatapas chay Gobiernomanta predicanankupaqmi kamachirqan (Mat. 10:7; 24:14).

Imamantachus rimanki chayman hina titulota churay. Bibliapiqa huk temallamantan askhata rimakun, discursota qospan ichaqa mana nishutachu rimana. Chaywanpas discursoq titulonman hinan rimasqaykitaqa allinta tupachinayki.

Sichus discursoykiq titulonta qan churanayki kanqa chayqa, ñawpaqta allinta qhawariy imamantachus rimanayki kanqa chayta. Hinaspa akllay allin yachachikuykunata, chaykunata discursopaq qelqa ruwasqaykipi churanaykipaq, ichaqa allintan qhawarinayki chaykuna discursoykipaq hina kananta.

Discursota tituloyoqtaña qorqasunkiku chayqa, allinta qhawariy imamantachus astawan rimana kanqa chayta, hinallataq imarayku ancha allinpuni kasqantapas. Chaymanta rimanaykipaq yachachikuykunata maskhasqaykiqa discursoq temanwan tupaqmi kanan. Ichaqa ñachus nirqasunkikuña ima qelqamanta ruwanaykipaq chayqa, discursoq titulonman hinan chayta preparanayki. Chaymantapas allintan yuyaykunayki imarayku uyariqniykikunapaq importante kanman chayta, imaynata yanapanman chaytapas, chhaynapin yachanki imatachus astawan entiendechinaykita.

¿Imaynatan allinta reparachiwaq discursoykiq temanta? Chaypaqqa qallariymantapachan yachachikuykunata allinta tupachinayki discursoykiq temanwan. Discursoykipaq hina kaq yachachikuykunallata churay, chaypaq qelqa ruwasqaykitapas kay libropi yachasqanchisman hina ruway. Chhaynapin allinta discursoq temanta reparachinki.

Discursoykiq temantaqa allinta reparachinki chaymanta sapa rato rimaspan. Chaypaq yachasunchis “munakuymanta” rimaq takimanta. Takiqqa ancha munakusqan runapaqmi chayta takin, payqa llapan takisqanpin munakuymanta riman. Manaña kaq simiwanñachu chaymanta takin chaypas, huk-hina simikunawanmi munakuy simita reparachin, rikch’anachiy simikunawan ima. Discursota qoshaspaykipas chaytan ruwanayki, llapan discurso qosqaykipin reparachinayki imachus teman kasqanta, imaynan takiqpas takisqanpi munakuy simita reparachin hinata. Chaytan ruwawaq huk-hina simikunawan discursoq temanmanta rimaspa. Chhaynata ruwanki chayqa, allintan uyariqkuna reparanqaku discursoykiq temanta.

Temataqa manan discursota qospallachu reparachinanchis, runakunaman predicaspanchispas chaytan ruwananchis. Pisillataña piwanpas parlashaspayki, estudiotaña qoshaspaykipas allintan reparachinayki imamantachus yachachisqaykita, chhaynapi mana qonqanankupaq. Chhaynaqa sichus kallpachakunki rimasqayki temata allinta reparachinaykipaq chayqa, allin discurso qoqmi kapunki, allintataq Diospa Simin Qelqamantapas yachachinki.