Yuyayninchista waqaychasun
1. ¿Iman 2013 watapi iskay p’unchay huñunakuyninchispaq tema, imapaqmi chay yanapawasun?
1 Jesusmi qatikuqninkunata yachachirqan Jehová Diosta tukuy sonqonkuwan, tukuy almankuwan, tukuy yuyayninkupiwan munakunankupaq (Mat. 22:37, 38). Kay watapi hatun huñunakuykunaqa sonqonchista kallpachananpaqmi ruwakamurqan. Yuyarisqanchis hina, hatun huñunakuyninchispa temanqa: “Sonqonchista allintapuni waqaychasun” nisqan karqan. 2013 watapi huk p’unchay huñunakuyninchispa temanqa: “Conciencianchista waqaychasun” nisqan. Qatimuq killamanta qallariq iskay p’unchay huñunakuykunapi temaqa: “Yuyayninchista waqaychasun”, nisqan; chayqa Mateo 22:37 textomantan horqokurqan. Chay huñunakuyqa yuyaykusqanchista allinta qhawarikunapaqmi yanapawasun, chhaynapin Dioswan allinpi kasun.
2. ¿Imakunatan hatun huñunakuypi kutichikunqa?
2 ¿Imatan t’aqwirikunqa? Iskay p’unchay huñunakuy tukuytaqa allin yachachikuykunatan yuyariyta munanchis. Chaypaqmi qelqasunman kay tapuykunaq kutichiyninta:
• ¿Imatan ruwasunman runakunaq yuyaykusqanta ama qatikunapaq?
• ¿Imaynatan runakunata reparachisunman tutayasqa yuyayniyoq kasqankuta?
• ¿Imayna yuyayniyoqmi kananchis?
• ¿Imakunapin yanapawasunman tukuy sonqowan yuyaymanay?
• ¿Imakunatan ruwasunman Diospa munasqanman hina yuyaykunapaq?
• ¿Imatan ruwankuman qosakuna, esposakuna, tayta-mamakuna, wawakunapas familiapi kusisqa kawsanankupaq?
• ¿Imata ruwaspan Diospa p’unchayninpaq listo kasunman?
• ¿Imaynatan allintapuni yuyaykusunman imatachus ruwananchista?
• ¿Imaynatan yanapawanchis imachus yachasqanchisman hina kawsay?
3. ¿Imaraykun allinpuni iskaynin p’unchay huñunakuyman riy, tukuy yuyaywan uyariy, chayman hina kawsaypas?
3 Saqraqa tukuy atisqantan ruwashan yuyayninchista waqllichinanpaq (2 Cor. 11:3). Chaymi allinta cuidananchis, manan kay pacha runakuna hinachu yuyaykunanchis, aswanpas Cristoq yuyaykusqanta hinan, chhaynapin kay millay pachawan mana samaykachikusunchu (1 Cor. 2:16). Kallpachakusun iskaynin p’unchay rinapaq, tukuy yuyaywan uyarinapaqpas. Chay yuyaychaykunan yanapawasun allinta yuyaykunapaq, chhaynapi tukuy sonqowan Diospa Gobiernonmanta willanapaq (1 Ped. 1:13).