Cheqaq kasqanta allinta sut’inchay

IMATAÑA niqtiykipas uyariqniykikunaqa tapukunkumanmi rimasqayki cheqaqpunichus kashan chayta. Chayraykun allinta qhawarichinayki ima nisqaykipas cheqaq kasqanta, otaq willanayki imaynapichus chaymanta yachankuman chayta, chhaynapin rikuchinki allin yachachiq kasqaykita. Ima allin yachachikuytapas willanayki kanman chayqa, allintan sut’inchanayki imarayku cheqaq kasqanta, chhaynapin yachachisqaykiqa creenapaq hina kanqa.

Apóstol Pabloqa uyariqninkunata iñichiytapuni munaspan imatapas allinta sut’incharqan, reparachirqan, tapurqan, sonqonkuman chayananpaq hinataqmi rimarqan, chhaynapin allin ejemplota saqewarqanchis pay hina ruwananchispaq (Hech. 18:4; 19:8). Ichaqa wakinqa runakunata q’otunankuraykun chhaynata yachachinku (Mat. 27:20; Hech. 14:19; Col. 2:4). Paykunaqa cheqaqpas kanman hinatan pantasqa yachachikuykunata yachachinku, mana allin yachachiqkunaq nisqanman hinan rimanku, hawan-ukhuntan imatapas yachachinku, manataq reparaytapas munankuchu yachachisqankuqa pantasqa kasqanta, runakunaq uyariy munasqallankutataq rimankupas creechiyta munaspanku. Ñoqanchisqa manan paykuna hinaqa yachachinanchischu.

Diospa Simin Qelqaq nisqanman hina rimay. Ñoqanchisqa manan yuyaykusqanchisman hinachu yachachinchis, aswanpas Bibliaq nisqallantan. Chayta ruwananchispaqmi allinta yanapawarqanchis allin yuyayniyoq hunt’aq kamachiq ruwamusqan qelqakuna, chaykunan kallpachawarqanchis tukuy yuyaywan Bibliata t’aqwinanchispaq. Chaymi runakunataqa Bibliawanpuni yachachinchis, chaytaqa ruwanchis manan cheqaq rimaqpaq qhawarichikuyta munaspachu, aswanpas paykuna kikinkupuni Bibliaq nisqanta qhawarinankupaqmi. Jesús hinan Diosta ninchis: “Simiykiqa cheqaq-kaypunin”, nispa (Juan 17:17). Manan pipas Jehová Diospa yachayninman atiyninmanpas aypanmanchu, paymi hanaq pachata kay pachata Kamaqqa, chaymi Simin Qelqaq nisqanman hina yachachinanchis, chhaynapin ima yachachisqanchispas allinpuni kanqa.

Wakin runakunaqa manan Bibliata reqsinkuchu, otaq mana Diosmanta hamusqanta hinachu qhawarinku. Chhayna runakunawan rimawaq chayqa, allintan yuyaykunayki ima ratopichus Bibliata qhawachiwaq chayta. Ichaqa kallpachakunaykin Bibliawanpuni yachachinaykipaq.

Uyariqniykikunaqa manan Bibliapi huk textota qhawachisqaykiraykullachu creesunkikuman rimasqaykitaqa. Allintapaschá entiendechinayki kanqa chay textoq ñawpaqninpi qatiqninpipas imamantachus rimashasqanta, chhaynapi rimasqaykiwan tupachinaykipaq. Sichus Diospaq hina kawsanamanta rimashaspa huk textota qhawachiwaq, manataq chay textoq ñawpanpipas qatiqninpipas willashanmanchu chay rimasqaykimanta chayqa, huk textokunatawanmi qhawarichinayki, chhaynapin uyariqkunaqa creenqaku Bibliaq nisqanman hina rimashasqaykita.

Leesqayki textoq nisqanman hinalla yachachiy, amataq chaymanqa hukkunata yapaykuychu. Chaymi allin yuyaywan leenayki. Chay texto huk chhikantaña yachachisqaykimanta rimashanman chaypas, uyariqniykikunamanqa allintan reparachinayki imaynatachus yachachisqaykiwan tupasqanta.

Yachachisqaykita mat’ipay. Mayninpiqa huk rikch’anachiykunawan yachachikuykunawan iman Bibliaq nisqanta mat’ipananchis kanqa, chhaynapi Bibliaq yachachisqankuna confianapaq hinapuni kasqanta qhawarichinanchispaq.

Tukuy imapas Diospa kamasqan kasqanta rikuchinanchispaqqa, rimasunmanmi hanaq pachapi rikusqanchis kaqkunamanta, sumaq allichasqa kashasqanmanta, otaq imanaqtinsi imapas sucedesqanmanta. Ichaqa Bibliaq nisqanman hinan chaykunamantaqa rimananchis (Job 38:31-33; Sal. 19:1; 104:24; Rom. 1:20). Diospa kamasqankunaqa sut’itan rikuchin Bibliaq willasqanqa cheqaqpuni kasqanta, chaymi allinpuni kanman chaykunamanta rimasqanchisqa.

¿Imaynatan pitapas entiendechiwaq Bibliaqa Diospa Siminpuni kasqanta? ¿Bibliamanta allin yachaq runakunaq nisqallantachu willawaq? Manachá. Paykunaq rimasqanqa manan confianapaq hinapunichu, hinaspapas paykunata respetaq runakunallapaqmi chayqa allin kanman. Sichus ancha yachaysapakunaq rimasqallanwan Biblia cheqaq kasqanta reparachiyta munasunman chayqa, pantaq runakunaq nisqallanmanmi hap’ipakushasunman, chhayna kaqtinqa manan allintachu takyanqa ima nisqanchispas. Chhaynaqa, ima yachachisqanchispas allin kananpaqqa Diospa Simin Qelqapi saphichasqan kanan, chaymantañan yachaysapa runakunaq nisqanwanqa yanapachikusunman.

Imamantaña rimanayki kanman chaypas, allintan rikuchinayki imarayku cheqaq kasqanta. Hayk’atachus chaymanta rimanaykipaqqa reparanaykin uyariqniykikuna imaynachus kasqankuta. 2 Timoteo 3:1-5 texto willashan kay tukukuy qaylla p’unchaykunapi runakuna imayna kasqankumanta, chaymanta rimashaspaykiqa willawaqmi lliwpa uyarisqan noticiamanta, yaqapaschá willawaq askha runakuna ‘mana munakuyniyoq’ kasqankumanta. Chaywanmi allinta sut’inchawaq tukukuy qaylla p’unchaykunapi kawsashasqanchista.

Huk yachachikuyta mat’ipanaykipaqqa imawanpas tupanachispan yachachiwaq. Chaymantataq Bibliaq nisqanman hina chayta sut’inchawaq. Chhaynapin uyariqkunaqa allinta reparankuman Bibliaq yachachikuyninqa iñinapaq hina kasqanta. Diospa Gobiernonmanta rimashaspaqa rimallawaqtaqmi kay pachapi kaq gobiernokunamantapas, chhaynapin entiendechiwaq Diospa Gobiernonpipas kamachikuqkuna kasqanta, chay kamachikuqkunataq juzganankupaq, yachachinankupaq, kamachinankupaqpas atiyniyoq kasqankuta, chay Gobiernota kasukuq runakunapas kasqantawan.

Bibliaq nisqanman hina kawsay allinpuni kasqantan mat’ipayawaq kawsayninchispi imapas pasasqanmanta willaspa. Willawaqmi qan kikiykita imachus sucedesqasuykimanta. Biblia estudiay allinpuni kasqanta rikuchinaykipaqmi willawaq imaynatachus chay ruway qanta yanapasqasuykimanta. Apóstol Pedron iñiqmasinkunata kallpachananpaq willarqan Jesuspa rikch’aynin huknirayman tukusqanmanta, chaytaqa pay kikinmi rikurqan (2 Ped. 1:16-18). Apóstol Pablopas willarqanmi imakunapichus tarikusqanmanta (2 Cor. 1:8-10; 12:7-9). Allinña imapas sucedewasqanchismanta willay chaypas, manan nishutaqa chaymanta willanachu, mana hinaqa nishutan kikinchista allinpaq qhawarichikushasunman.

Runakunaqa manan kaqllachu kanku, nitaqmi huk-hinallamantachu imatapas yuyaykunku, wakinqa iñillankumanmi ima nisqanchispipas, wakinmi ichaqa mana. Chhaynaqa allinta reparay uyariqniykikuna imaynachus kasqankuta, chayman hina yachachinaykipaq sut’inchanaykipaqpas. Biblian nin: “Yachayniyoqqa allin chayasqatan riman, rimasqankunaqa aswantan creechin”, nispa (Pro. 16:23).