Perea ladopi predican Judeaman rishaspa

Jesusqa pisi tiempollan ‘Jordán mayu chimpapi’ predicasharan Pereapi (Juan 10:40). Chaymantan ichaqa Jerusalenman viajanan karan.

Payqa manan sapallanchu puriq. Paywanmi kasharan discipulonkuna, ‘ancha askha runakunapiwan’, chaypin kasharan impuesto cobraqkuna, juchasapakuna ima (Lucas 14:25; 15:1). Jesusmanta rimapakuq umallikunapas chaypin kasharanku. Paykunaqa allintan piensananku karan chinkasqa ovejamanta, chinkasqa churimanta, qhapaq runamanta Lazaromantawan Jesuspa willasqanpi (Lucas 15:2; 16:14).

Jesusqa yuyarishanmanmi karan chay runakunaq rimapakusqankuta burlakusqankutapas, chaypaschá discipulonkunaman wajmanta niran Galileapi kashaspa wakin nisqankunata.

Niranmi: ‘¡Ay imaraqmi kanqa juchaman urmachiqkunamantaqa! Allinta cuidakuychis. Wayqeykichus qan contra juchallikun chayqa, payta anyay; juchanmantachus pesapakun chayqa, perdonapuy. Juj p’unchaypi qanchis kutitaña qan contra juchallikuspa, qanchis kutillatataq qanman kutimuspa nisunkiman: “Perdonaway”, nispa chayqa, perdonapunkin’, nispa (Lucas 17:1-4). Chayta niqtinqa Pedroqa yuyariranchá perdonaymanta Jesusta tapukusqanta (Mateo 18:21).

Jesuspa nisqanta junt’ayqa manan sinchi sasachu karan. Chaymi discipulonkuna ‘yanapawayku iñiyniyoq kanaykupaq’ niqtinku Jesusqa niran: ‘Iñiyniykichischus mostaza muju sayayllapas kanman chayqa, kay sach’atan niwaqchis: “Lamar-qochapi mallkikamuy”, nispa, jinan chay sach’aqa kasusunkichisman’, nispa (Lucas 17:5, 6). Chhaynaqa iñiyniyoq kaspaqa mana atinakunataraqmi paykunaqa ruwananku karan.

Chaymantan Jesusqa k’umuykukuq kayta yachachinanpaq niran: “¿Mayqenniykichistaq kamachiykichis chajrapi yapumusqanmanta otaq uywa michimusqanmanta kutimuqtin niwaqchis: ‘Usqhaylla kayman jamuy, jinaspa mesapi mijuy’, nispa? ¿Manachu aswanpas niwaqchis: ‘Cenanaypaq imallatapas wayk’urapuway, jinaspa mandilta churakuspa atiendeway, mijuyta ujayta tukunaykama; chaymantaña qanqa mijunkipas ujankipas’, nispa? Kamachiqa imachus ruwanantataq ruwashan chayqa, manan patronqa ‘gracias’ ninmanchu ¿riki? Chhaynaqa, qankunapas ima kamachitapas ruwaspaykichisqa ninkichismi: ‘Noqaykuqa mana valeq kamachikunallan kayku, imachus ruwanayku karan chayllatan ruwayku’”, nispa (Lucas 17:7-10).

Chhaynaqa llapanchispas Diospa munaynintan ñaupaqtaqa ruwananchis, ancha allinpaqtaqmi chay ruwaytaqa qhawarinanchispas.

Chay qhepallamanmi Mariawan Martawan juj runata Jesusman kachankuman karan: “Señor, munakusqayki runan onqosqa kashan”, nispa nimunanpaq. Paykunaqa Lazaroq panankunan karanku, Judea ladopin tiyarankupas (Juan 11:1-3).

Amigon Lázaro onqosqa kasqanta yachaspan Jesusqa niran: “Chay onqoyqa manan wañunanpaqchu kashan, aswanpas Dios jatunchasqa kananpaqmi kashan, chhaynapi Diospa Churinpas chaywan jatunchasqa kananpaq”, nispa. Iskay p’unchaytawan chaypi qhepakuspataq discipulonkunata niran: “Jaku, Judeata kutisun”, nispa. Jinan paykunaqa niranku: “Yachachikuq, qayninpallamá riki Judeapiqa wañuchiyta munashasunkiku, ¿chaychu kunan kutiyta munashanki?”, nispa (Juan 11:4, 7, 8).

Jinan Jesusqa niran: “Chunka iskayniyoq horasmi p’unchayqa ¿riki? Pipas p’unchaypi puriqqa manan imawanpas laq’akunqachu, k’anchayta rikusqanrayku. Pipas tutapi puriqmi ichaqa imawanpas laq’akunqa, k’anchay mana kasqanrayku”, nispa (Juan 11:9, 10). Jesusqa chayta ninman karan Yayanpa kamachisqan llank’anata manaraq tukusqanrayku, chaymi payqa tukuy atisqanta ruwanan karan chayta junt’apananpaq.

Chaymantan Jesusqa niran: “Amigonchis Lazaroqa puñurapunmi; noqaqa payta rijch’arichiqmi risaq”, nispa. Jinan discipulonkunaqa chayta mana entiendespa niranku: “Señor, puñushantaq chayqa, qhaliyallanqachá”, nispa. Chaymi Jesusqa sut’inta paykunata niran: “Lazaroqa wañupunmi [...]. Jaku payman risunchis”, nispa (Juan 11:11-15).

Judeapiqa askhan Jesusta wañuchiyta munasharanku, chaymi Tomasqa apostolmasinkunata niran: “Jaku noqanchispas paywan kuska wañumunanchispaq”, nispa (Juan 11:16).