¿Chaskikushankichu Jehová Diospa llaqtanpi yachachikuykunata?

1. ¿Imaynatan Jehová Dios qhawarin serviqninkuna preparasqa kanankuta?

¹ ‘Yachachiqninchis’ Jehová Diosqa ancha importantepaqmi qhawarin serviqninkuna allin preparasqa kanankuta (Isa. 30:20). Ñawpaqtaqa Churintan allinta yachachirqan (Juan 8:28). Adanpa huchallikusqan qhepatapas Jehová Diosqa munakuywanmi runakunata yachachishallarqan (Isa. 48:17, 18; 2 Tim. 3:14, 15).

2. ¿Iman pachantinpi aparikushan?

² Kunan tiempopipas Jehová Diosqa pachantinpin serviqninkunata yachachishan. Isaías nisqan hina, millonninpi runakunan ‘Diospa wasin orqoman’ hamushanku (Isa. 2:2). ¿Imapaqmi? Jehová Dioswan yachachisqa kanankupaqmi (Isa. 2:3). 2010 watapin Jehová Diospa testigonkunaqa 1.600 millón horakunata predicarqanku Bibliamantapas yachachirqanku. Hinaspapas pachantinpin sapa semana 105.000 iñiq t’aqakunapi allinta preparawanchis, hunt’aq kamachitaq qelqakunata ruwamun phisqa pachak rimaykuna maspiraq.

3. ¿Imaynatan yanaparqasunki Jehová Diospa yachachisqasuyki?

³ Allin preparasqa. ¡Ancha allinninchispaqmi Diospa yachachiwasqanchisqa! Chhaynapin yacharqanchis Diosqa sutiyoq kasqanta ñoqanchispi interesakusqantapas (Sal. 83:18, NM; 1 Ped. 5:6, 7). Chaymantapas yachallarqanchistaqmi imarayku ñak’arisqanchista wañusqanchistapas, imaynatas kusikuyta tarisunman, imapaqsi kawsanchis chaytapas. Ichaqa manan chayllachu, Diosninchisqa yachachiwallanchistaqmi imayna kawsananchista chay hinapin ima ruwasqanchispas allinkama kapuwasun (Jos. 1:8).

4. ¿Ima allin yanapaykunan kashan? ¿Imaraykun Diospa yachachikuyninkuna allinninchispaq?

⁴ Jehová Diosqa yachachillantaqmi serviqninkunata astawan paypa llaqtanpi llank’anankupaq. 4-6 paginakunapi Escuelakuna kasqanwanmi qanpas aswan preparasqa kawaq. Sichus munasqayki Escuelaman mana riyta atiwaqchu chayqa, yuyaykuy mayqenmanmi riyta atiwaq chayta. ¿Wayna-sipaskunari? Profesorninkupas wakin runakunapas universidadman haykunankupaqmi kallpachanku. Chayta ruwashanankumantaqa, espiritual ruwaykunapi astawan ruwanankupaq kallpachasun. Sichus Diospa qowasqanchis yachachikuyman hina astawan preparakusun chayqa, kunanpas hamuq tiempopipas kusisqan kawsasun (Sal. 119:105; Juan 17:3).

Jehová Diospa llaqtanpi allin yachachisqa kanapaq Escuelakuna

Leeyta, qelqayta yachanapaq Escuela

• ¿Imapaqmi chay Escuela? Chay escuelaqa leeyta qelqayta yachanankupaqmi, chhaynapi Bibliata estudianankupaq hukkunamanpas yachachinankupaq.

• ¿Hayk’a tiempon? Imayna yachasqankuman hinan.

• ¿Maypin aparikun? Huñunakuna Wasipi.

• ¿Pikunapaqmi? Llapa munaqkunapaq.

• ¿Imaynatan haykuwaq? Iñiq t’aqapi umallikunan necesitakusqanman hina invitanku lliw munaqkunata.

Bibliamanta Allin Yachachiq Kanapaq Escuela

• ¿Imapaqmi chay Escuela? Predicaqkunatan yachachin Diospa Siminmanta allin yachachiq kanankupaq.

• ¿Hayk’a tiempon? Tukuy tiempo.

• ¿Maypin aparikun? Huñunakuna Wasipi.

• ¿Pikunapaqmi? Llapa predicaqkunapaq. Chaymantapas invitakullantaqmi huñunakuyman sapakutin hamuqkunata, Bibliaq yachachisqanman hina kawsaqkunata.

• ¿Imaynatan haykuwaq? Escuelapi umalliqwan rimay.

Huk rimayta yachay munaqkunapaq Escuela

• ¿Imapaqmi chay Escuela? Huk rimaypi predicanankupaqmi yachachikun.

• ¿Hayk’a tiempon? 4 otaq 5 killa. Huk otaq iskay hora yachachikun, sábado tutamantankunan ruwakunman.

• ¿Maypin aparikun? Huñunakuna Wasipi.

• ¿Pikunapaqmi? Huk rimaypi predicayta munaqkunapaq ichaqa allinpaq reqsisqakuna.

• ¿Imaynatan haykuwaq? Betel Wasin necesitakusqanman hina chay cursota ruwachin.

Huñunakuna Wasikunata Hatarichinapaq

• ¿Imapaqmi chay Escuela? Huñunakuna Wasikunata hatarichinapaq otaq allichanapaq. Chayta yachanankupaq manaña Escuela kanchu chaypas, wasi hatarichiypi yanapakuspan yachanqaku.

• ¿Hayk’a tiempon? Yanapakuqpa imaynapi tarikusqanman hinan.

• ¿Maypin aparikun? Maypis wasita hatarichinanku kashan chaypaq Comité Regional de Construcción nisqanman hinan. Hinaspapas lloqlla otaq terremoto pasasqan llaqtakunamanmi viajanku chaypi iñiqmasikunata yanapanankupaq.

• ¿Pikunapaqmi? Chayman riy munaqkunaqa bautizasqan kananku umallikunaq qhawarisqankuman hinataq allin cristianokuna. Qharipas warmipas rinkumanmi, wasita ruway yachaqpas mana yachaqpas.

• ¿Imaynatan haykuwaq? Iñiq t’aqa umallikunamanta mañakuy Cuestionario para trabajadores voluntarios en Salones del Reino (S-82) nisqa papelta hinaspa chayta hunt’ay.

Precursorkunapaq Escuela

• ¿Imapaqmi chay Escuela? Precursorkunatan yachachin ‘Diospa qosqan llank’ayninkuta allinta hunt’anankupaq’ (2 Tim. 4:5).

• ¿Hayk’a tiempon? 2 semana.

• ¿Maypin aparikun? Betel Wasin akllan maypi aparikunanta, mayninqa huñunakuna wasipin aparikun.

• ¿Pikunapaqmi? Huk wataña precursor kaqkunapaqmi.

• ¿Imaynatan haykuwaq? Watukuq umallin invitan.

Mosoq Betelitakunapaq Escuela

• ¿Imapaqmi chay Escuela? Kay escuelaqa chayllaraq Betel wasiman haykuqkunatan yanapan allinta imatas ruwanankupaq.

• ¿Hayk’a tiempon? 16 semanakunan, semanapi huk hora aparikun.

• ¿Maypin aparikun? Betel Wasipi.

• ¿Pikunapaqmi? Betel wasipi llank’aqkunapaq, huk watapaq otaq más tiempo llank’anankupaq invitasqa kaqkunapaqpas.

• ¿Imaynatan haykuwaq? Betel wasin chaymantaqa encargakun.

Iñiq T’aqapi Umallikunapaq, Yanapakuq Qharikunapaqwan Escuela

• ¿Imapaqmi chay Escuela? Umallikunata yanapakuq qharikunatawanmi yachachin ruwanankuta allinta hunt’anankupaq (Hech. 20:28). Kay Escuelaqa manan sapa watanchu aparikun aswanpas umalli t’aqaq nisqanman hinan.

• ¿Hayk’a tiempon? Kay qhepa watakunapin umallikunapaq karqan huk p’unchay kuskanpiwan, yanapakuq qharikunapaqtaq huk p’unchay.

• ¿Maypin aparikun? Huñunakuna Wasipi otaq Hatun Huñunakuy Wasipi.

• ¿Pikunapaqmi? Umallikunapaq, yanapakuq qharikunapaqwan.

• ¿Imaynatan haykuwaq? Watukuq umallin invitan.

Iñiq T’aqa Umallikunapaq Escuelaa

• ¿Imapaqmi chay Escuela? Umallikunatan yanapan iñiq t’aqapi ruwanankuta allinta hunt’anankupaq.

• ¿Hayk’a tiempon? Phisqa p’unchay.

• ¿Maypin aparikun? Betel Wasin akllan, Huñunakuna Wasita otaq Hatun Huñunakuy Wasita.

• ¿Pikunapaqmi? Umallikunapaq.

• ¿Imaynatan haykuwaq? Betel Wasin invitan.

Iñiq T’aqakuna Watukuqkunapaq Esposankupaqwan Escuelab

• ¿Imapaqmi chay Escuela? Watukuq umallikunata, iñiq t’aqakunata qhawariqtawanmi (Superintendente de distrito) yachachin iñiq t’aqakunata allinta qhawanankupaq, ‘astawanqa Diospa Siminta willanankupaq yachachinankupaqwan’. Chaymantapas yachachinmi allin michiq kanankupaq (1 Tim. 5:17; 1 Ped. 5:2, 3).

• ¿Hayk’a tiempon? Iskay killa.

• ¿Maypin aparikun? Betel Wasin akllan.

• ¿Pikunapaqmi? Watukuq umallikunapaq.

• ¿Imaynatan haykuwaqchis? Betel Wasin invitan watukuq umallikunata esposankutawan.

Soltero Qharikunapaq Escuelac

• ¿Imapaqmi chay Escuela? Umallikunata yanapakuq qharikunatawanmi yachachin huk ruwaykunata allinta ruwanankupaq. Yaqa llapankutan kachanku kasqan nacionllankupi maypis predicaqkuna necesitakushan chaypi yanapakunankupaq. Wakinqa yaqapas huk nacionman rinkuman, sichus paykuna munankuman chayqa.

• ¿Hayk’a tiempon? Iskay killa.

• ¿Maypin aparikun? Betel Wasin akllan, Huñunakuna Wasipi otaq Hatun Huñunakuy Wasipi aparikunanpaq.

• ¿Pikunapaqmi? Soltero qharikunapaqmi, 23 watayoqmanta 62 watayoqkaman kananku, qhalitaq. Iñiqkunata yanapay munaqkuna, maypi predicaqkuna necesitakusqanpi yanapakuy munaqkunan kananku (Mar. 10:29, 30). Iskay watañan umalli otaq siervo ministerial kananku.

• ¿Imaynatan haykuwaq? Wakin llaqtakunapin iskay p’unchay huñunakuy kaqtin waqyakun munaqkunata huk huñunakuyman, chaypin astawan willakun imaynatas chay Escuelaman rinkuman chayta.

Casarasqa Cristianokunapaq Escuelad

• ¿Imapaqmi chay Escuela? Casarasqa cristianokunatan Diospa llaqtanpi allin yanapakuq kanankupaq preparan. Escuelata tukuqtinkun kaq nacionllankupi maypis predicaqkuna astawan necesitakushan chayman kachanku. Sichus paykuna munankuman chayqa, yaqapaschá huk nacionman kachankuman.

• ¿Hayk’a tiempon? Iskay killa.

• ¿Maypin aparikun? Chayllaraq qallarikushaqtinqa Centro Educativo de la Watchtower nisqapin karqan Patterson (Nueva York). Tiempowanqa Betel Wasin akllanqa maypi aparikunanta, yaqapaschá Huñunakuna Wasipi otaq Hatun Huñunakuy Wasipi kanqa.

• ¿Pikunapaqmi? Iskayninkun 25 watayoqmanta 50 watayoqkama kananku, qhalitaq kananku, iskay watañan tukuy tiemponkuwan Diospa llaqtanpi llank’ashananku, Isaías nisqanta hinataq ninanku: “Ñoqan kaypi kashani, ñoqata kachaway”, nispa (Isa. 6:8). Hinaspapas iskay watañan casarasqa kananku, predicaqkunaq necesitakusqanman rinankupaq hinataq kashananku.

• ¿Imaynatan haykuwaqchis? Wakin llaqtakunapin huk p’unchay huñunakuypi waqyakun munaqkunata huk huñunakuyman, chaypin astawan willakun imakuna necesitakusqanta chay Escuelapi kanankupaq.

Escuela Bíblica de Galaad de la Watchtower

• ¿Imapaqmi chay Escuela? Precursorkunata, tukuy tiemponkuwan Diospa llaqtanpi llank’aqkunatawanmi preparakun misionero kanankupaq.

• ¿Hayk’a tiempon? Phisqa killa.

• ¿Maypin aparikun? Centro Educativo de la Watchtower, Patterson (Nueva York) llaqtapi, chayqa Estados Unidos nacionpin.

• ¿Pikunapaqmi? Chay escuelaqa casarasqakunallapaqmi. 21 watayoqmanta 38 watayoqkaman haykunkuman. Sapankankun iskay watallapas tukuy tiemponkuwan servishananku, kinsa watañan bautizasqa kananku, iskay watataq casarasqa, inglés rimaytan yachananku qhalitaq kanankupas. Haykullankumantaqmi huk nacionpi precursorkunapas (misionero hina llank’aqkunapas), watukuq umallikuna, betelitakuna, soltero qharikunapaq escuelata tukuqkuna, casarasqa cristianokunapaq escuelata tukuqkunapas.

• ¿Imaynatan haykuwaqchis? Wakin nacionkunapiqa hatun huñunakuypin waqyakun munaqkunata huk huñunakuyman, chaypin astawan chaymanta willakun. Ichaqa, sichus nacionniykipi chaypaq mana waqyakunchu chayqa, Betel Wasimanmi qelqawaq astawan chaykunamanta yachanaykipaq.

Betel Wasimanta Encargakuqkunapaq Esposankupaqwan Escuela

• ¿Imapaqmi chay Escuela? Betel Wasimanta Encargakuqkunatan preparanku Betel Wasita allinta aparinankupaq, iñiq t’aqakunaq predicasqanta qhawarinankupaq, watukuq umallikunatapas. Chaymantapas qelqakuna t’ikrakusqanta, ruwakusqanta apachikusqantapas qhawarinankupaq, huk ruwaykunapas allinlla aparikunanpaq (Luc. 12:48b).

• ¿Hayk’a tiempon? Iskay killa.

• ¿Maypin aparikun? Centro Educativo de la Watchtower, Patterson (Nueva York) llaqtapi, chayqa Estados Unidos nacionpin.

• ¿Pikunapaqmi? Betel Wasimanta Encargakuqkunapaq otaq Comité de País nisqapaqwan.

• ¿Imaynatan haykuwaqchis? Umalliq T’aqan paykunata invitan esposankutawan.

[Uranpi willakuykuna]