BIBLIAMANTA TAPUKUYKUNA

¿Biblia Diospa siminpunichu?

Diosmanta hamuq Bibliaqa manan kaqllachu huk librokunamanta. Millonninpin Bibliataqa ruwakamurqan askha rimaykunapitaq. Bibliapi yachachikuykunaqa runakunaq kawsaynintan cambian (leey 1 Tesalonicenses 2:13; 2 Timoteo 3:16).

Bibliapiqa hamuq tiempomanta profeciakunan tarikun, chaykuna rikuchin Diosmanta hamusqanta. Hinaspapas Kachi Qocha qayllanpi kaq qaqa t’oqopin tarirqanku Isaiaspa qelqasqamanta huk copiata, chayqa qelqakurqan 100 wata más manaraq Jesús hamushaqtinmi. Chaypin Babilonia llaqta thunisqa kanamanta willakurqanña, chay profeciaqa Jesuspa wañupusqan askha watakuna qhepamanñan hunt’akurqan (leey Isaías 13:19, 20; 2 Pedro 1:20, 21).

¿Imaynatan Biblia qelqakamurqan?

Waranqa soqta pachak watakunapi hinan Bibliataqa 40 runakuna qelqarqanku. Bibliaqa qallariyninmanta tukuyninkaman hukllamanta willashan. ¿Imaynatan chayta ruwarqanku? Jehová Dios paykunata yuyaychasqanrayku (leey 2 Samuel 23:2).

Diosmi mayninpiqa angelkunawan, runakunaq mosqoyninpi rikhurispa Siminta qelqachirqan, ichaqa astawanqa imachus yuyaykusqantan runakunaq yuyayninman churarqan, paykunataq rimasqanku simikunapi qelqarqanku (leey Apocalipsis 1:1; 21:3-5).