BIBLIAMANTA TAPUKUYKUNA
¿Imaraykun Jesuspa wañupusqanta yuyarinanchis?
¿Ima bendicionkunata chaskisun Jesuspa wañupusqanwan? (Isaías 25:8; 33:24)
Jesuspa wañupusqanmi imamantapas aswan importante, ¿imarayku? Wañusqanwanmi runakuna hamuq tiempopi ancha sumaq kawsayta chaskinqaku. Runakunaqa manan onqonankupaqchu, wañunankupaqchu, nitaq mana allinkunata ruwanankupaqchu kamasqa karqanku (Génesis 1:31). Adanwan Evawanmi huchaqa qallarirqan, Jesusmi ichaqa huchamanta wañuymantawan salvawananchispaq kawsayninta qorqan (leey Mateo 20:28; Romanos 6:23).
Jehová Diosqa anchatan runakunata munakurqan, chaymi churinta kay pachaman kachamurqan ñoqanchisrayku wañunanpaq (1 Juan 4:9, 10). Jesusmi qatikuqninkunata kamachirqan t’antawan vinowan wañupusqanta yuyarinankupaq. Sapa wata chayta yuyarispan Jehová Diosta churintawan “gracias” nishanchis munakuwasqanchismanta (leey Lucas 22:19, 20).
¿Pikunan t’antata mikhunqaku vinotapas tomanqaku?
Jesusmi manaraq wañupushaspa qatikuqninkunata kamachirqan wañusqanta yuyarinankupaq. Chaypin paykunawan rimanakurqan hanaq pachapi reykuna sacerdotekuna kanankupaq (Mateo 26:26-28). Kunanpas waranqa-waranqanpi runakunan Jesuspa wañupusqanta yuyarinqaku, ichaqa chay rimanakuypi kaqkunallan t’antata mikhunqaku vinotapas tomanqaku (leey Apocalipsis 5:10).
2.000 watakuna hinañan Jehová Dios runakunata akllashan churinwan kuska reykuna kanankupaq (Lucas 12:32). Chay akllasqa runakunaqa pisillan kanku, kay pachapi kawsayta suyakuqkunan ichaqa askha kanku (leey Apocalipsis 7:4, 9, 17).