BIBLIAMANTA TAPUKUYKUNA
¿Imaraykun millay ruwaykuna kan?
¿Pitaq Jesusta tanqaran mana allin kaqta ruwananpaq? (Mateo 4:8-10)
Llapa runakunan sumaq sonqo sut’illanta rimaq kayta munanku. Chhaynaqa, ¿imaraykun millay ruwaykuna kan? Sapa p’unchaymi mancharikunapaq noticiakunata uyarinchis. ¿Pin runakunata tanqan mana allin ruwaykunata ruwanankupaq? (Leey 1 Juan 5:19.)
¿Mana allin ruwaykunata ruwanapaqchu Jehová Dios kamawarqanchis? Manan. Aswanpas payqa payman rikch’akuqta, pay hina munakuq kananchispaqmi ruwawarqanchis (Génesis 1:27; Job 34:10). Hinaspapas ñoqallanchismanta imatapas decidinapaqmi ruwawarqanchis. Ñawpa tayta-mamanchisqa mana munarqankuchu Dios kasukuyta, chaymi mana allinta ruwanankupaq decidirqanku. Chayta ruwaspanku pantaq runa kapurqanku, wawankunapas kaq pantaq runa kapullarqankutaq (leey Deuteronomio 32:4, 5).
¿Kallanqapunichu millay ruwaykuna?
Diosmi munan mana allin ruwaykunata sonqonchismanta wikch’unanchista (Proverbios 27:11). Allin runa kananchispaqtaq yanapaykunatan qowanchis. Sichus kasukusun paymantaq rikch’akusun chayqa, kusisqan kasun. Ichaqa manayá kay tiempopiqa ch’uyata kasukuyta atisunchu. Chhaynaqa, ¿pantaq runallachu kasun? (Leey Salmo 32:8.)
Millay ruwaykunaqa sinchitan runakunata llakichiwanchis, chayta reparananchispaqmi Jehová Dios hinallata qhawarqan millaykuna kananta. Ichaqa manan wiñaypaqchu hinallata qhawanqa (2 Pedro 3:7-9). Pisi tiempomantan kay hallp’ata sumaq sonqo runakuna hunt’aykunqa, llapankutaqmi Diosman rikch’akuq kanqaku (leey Salmo 37:9-11).