¿Iman yanapasunkiman sapa semana Bibliata estudianaykipaq?
¿SASAPAQCHU qhawarinki Biblia estudiayta? ¿Aburrikunkichu? Llapanchistan chayqa pasawanchis. Chhaynaña kaqtinpas wakin ruwaykunataqa ruwanchismi sasaña kaqtinpas. Mayninpi qellakunchisña bañakuyta chaypas bañakunchispunin ¿riki?, chay qhepamanqa thajmi cuerponchisqa kapun. Chhaynallataqmi pasan Bibliata estudiaqtinchispas, estudiasqanchis qhepamanqa thajmi kanchis (Efes. 5:26). Qatimuqpi ruwaykunan yanapasunki sapallaykipi Biblia estudiayta ama saqenaykipaq:
Juj horariota ruwakuy. Jehová Diosta serviqkunaqa kallpachakunanchismi “allin kaqkunata” ruwananchispaq, chaykunamanta jujninmi kashan sapa semana Bibliata estudiay (Filip. 1:10). Ichaqa estudiayta ama qonqanaykipaqqa chay horario ruwakusqaykitan sut’iman churanayki. Perqapi otaq refrigeradoraq punkunpin chayta k’askachiwaq. Chaymantapas juj alarmatan churakuwaq chhaynapi ama qonqanaykipaq.
Atisqaykiman jinalla estudiay. Wakinninchisqa yaqapaschá juj horapas maspas estudiasunman, wakinninchistaq ichaqa pisi tiempolla estudiasunman. Sapankanchismi allinta reqsikunchis, chayman jinan tiemponchista t’aqakunanchis. Sichus mana ganasniyki kanchu estudianaykipaq chayqa, chunka minutollatapas estudiay. Estudiayta qallarisqayki qhepamanqa yaqapaschá aschatawan estudiayta munanki (Filip. 2:13).
Ñaupaqmantaña ajllay imakunamantachus estudiayta munanki chayta. Sichus estudianayki hora chayamuqtinraq piensanki imamantachus estudianki chayta chayqa “tiempoykitan usuchinki” (Efes. 5:16). Chhaynaqa, ñaupaqmantapacha qelqay imakunamantas estudiawaq chayta. Chay qhepamanqa yaqapaschá jujkunamantawan yachayta munanki, chaykunatapas qelqay.
Ima horapi estudianaykitaqa cambiallawaqmi. Ñaupaqpi nikamusqan jina, Diosta serviqkunaqa kallpachakunanchismi sapa semana sapallanchispi Bibliata estudiananchispaq. Ichaqa sichus chay ajllakusqayki p’unchaypi mana atishankichu estudiayta chayqa atiwaqmi juj p’unchaypi estudiayta.
Sapa semana sapallanchispi Bibliata estudiayqa allinninchispaqmi. Chayta ruwaspaqa astawanmi Diosman asuykusunchis, allin yuyaywanmi imatapas ruwasunchis, thajmi kasunchispas (Jos. 1:8).