Imapaqmi predicanchis
1. ¿Imaynatan Jehová Dios qhawarin predicasqanchista, imaynatataq runakuna kutichinku?
1 Diospa Simin Qelqan qhawarichin cristianokunata, Jehová Diospa munayninta ruwasqankupi atipaqkunata hina (2 Cor. 2:14-16). Jehová Diospa siminta yachachisqanchisqa sumaq q’apashaq incienso hinan. Allin willakuykuna sumaq kasqan raykun wakin runakunaq sonqonman chayan, hukkunataqmi ichaqa mana uyarikunkuchu. Askha runakunaña mana uyariyta munankuchu chaypas, manan yanqapaqchu llank’ayninchisqa. Kunanqa qhawarisun imapaqmi predicanchis.
2. ¿Imatan rikuchinchis predicasqanchiswan?
2 Jehová Diosta hatunchanapaq: Satanasmi nin: runakunaqa Jehová Diosta servinku imatapas chaskisqanku raykullan, nispa (Job 1:9-11). Cristianokunan ichaqa predicasqanchiswan rikuchisunman ch’uya sonqowan Diosta yupaychasqanchista. Askha publicadorkunan kasukushanku predicanapaq, discipulokuna ruwanapaqpas kamachikuyta, sasachakuypi kashaspapas otaq askha runakuna mana uyariyta munaqtinkupas. ¡Anchatan Jehová Diospa sonqonta kusirichin hunt’a sonqowan kasukusqanchis! (Pro. 27:11.)
3. ¿Imaraykun ancha importante Diospa sutinmanta munayninmantapas willashallay?
3 Predicacionwanqa yanapashallanchistaqmi Diospa munaynin hunt’akunanpaq. Satanaspa kamachisqan pacha thunichisqa kananmantan, Jehová Dios nin: ‘wak suyukunan yachanqaku ñoqa Señor Dios kasqayta’, nispa (Eze. 39:7). Llapa runakuna chaymanta yachanankupaqqa, Diospa kamachinkunan willashanallanku paypa sutinta munaynintawan “llapa suyukunaman, ayllukunaman, tukuy t’aqa rimaqkunaman, llaqtakunamanwan” (Apo. 14:6, 7).
4. ¿Imaynatan predicasqanchiswan runakunata juzgakunqa?
4 Runakuna juzgasqa kananpaq: Allin willakuykunamanta predicayqa runakuna juzgasqa kananpaqwanmi. Apóstol Pablon willaran ‘Diosta mana reqsiqkunata, Señorninchis Jesucristomanta allin willakuykunata mana kasukuqkunatawan’ Jesucristo muchuchinanmanta (2 Tes. 1:8, 9). Runakunaqa juzgasqa kanqaku allin willakuykuna imayna chaskisqankuman hina. Chaytan Diospa kamachinkunaqa hunt’anankupuni. Runakunaq wañusqanmanta mana huchachasqa kanapaqqa, willashanallapunin Reinomanta qespichiq willakuykunata (Hech. 20:26, 27).
5. ¿Imaynatan predicasqanchis rikuchin Diospa khuyapayakuyninta?
5 Runakunata Dios chaskinanpaq yanapaypi kallpachakusqanchismi rikuchin Jehová Diospa khuyapayakuyninta (1 Tim. 2:3, 4). Runakunaq kawsaynin sapa p’unchay mana kaqllachu kasqanta yachaspan, sapa kutin visitaspa kallpachanchis Jehová Diosta maskhanankupaq, manaraq tiempo tukukushaqtin. Chayta ruwaspan rikuchinchis “Diospa ancha khuyapayakuyninta”, payqa ‘manan pitapas chinkananta munanchu, aswanpas huchata saqespa payman llapa kutirikunankutan munan’ (Luc. 1:78; 2 Ped. 3:9).
6. ¿Imakunapin yanapawanchis Jehová Diospa munayninta ruwasqanchis?
6 Allinninchispaq: Jehová Diospa munayninta ruwaspan pakaykusqa kanchis, chaymi yanapawanchis Diospa ‘chayamunan p’unchayta suyanapaq’, kay pachapi millay ruwaykunawanpas mana pantachisqa kanapaq (2 Ped. 3:11-14; Tito 2:11, 12). Chay rayku ‘mana kuyurispa qaqata sayasun, Señorpa llank’ananpi aswan-aswanta llank’aspa’, yachanchismi predicanapaq kallpachakusqanchisqa mana yanqapaqchu kasqanta (1 Cor. 15:58).