Hukkunapi interesakusun tapuykunata ruwaspa uyarispapas
1 Runakunaqa munanku imapas yuyaykusqanku rimayta, ichaqa manan munankuchu hukkunaq anyapayananta nitaq tapupayananta. Chay raykun cristiano kamachikunaqa yuyaywanpuni tapunanku uyariqkunaq rimarinankupaq (Pro. 20:5).
2 Tapuyninchiskunaqa manan runakunata manchachinanchu, aswanmi paykunaq kutichinankupaq hinalla kanan. Wasin-wasinta rispa huk wayqenchis tapun: “¿Hayk’aqllapas llapallanchis respetanakuspa kawsasunmanchu?”, nispa. Kutichisqanman hinataq nin: “¿Imata ruwana chayman aypanapaq?”, otaq “¿Ima rayku ninki chhaynata?”, nispa. Huk wayqeñataq maypipas predicaspa wawayoqkunata tapun: “¿Iman tayta-kaymanta astawan kusichisunki?”, nispa. Chaymanta tapullantaq: “¿Iman astawan llakichisunki?”, nispa. Kay hina tapuykuna uyariqkunata mana mat’ipayaspalla rimarichin. Manataq uyariqninchiskuna kaqllachu kanku chayqa, allinmi kanman llank’ananchispi sapanka predicasqanchiskunapaq hina tapuy.
3 Ima yanapanqa rimarinankupaq. Sichus runakuna rimayta munanqaku chayqa, pacienciawan ama tatichispalla uyarisun (Sant. 1:19). Kutichisqanmanta agradecey (Col. 4:6). Khaynata niwaqmi: “Allinpunin chay nisqaykiqa”, nispa. Atisqaykiman hina sonqomanta kallpachay. Sumaq sonqowan huk tapuykunatapas ruway, imatachus piensasqanta yachanapaq, ima raykutaq chhaynata piensasqantapas. Imakunapichus tupachisqaykichismanta rimaychis. Huk textomanta rimanapaq tapuwaqmi: “¿Hayk’aqllapas piensarankichu khayna kananta?”, nispa. Ama dogmático kaychu, amataq ch’aqwakuychu (2 Tim. 2:24, 25).
4 Tapusqanchisman uyariqkunaq kutichiyninqa imayna uyarisqanchismantan kanqa. Runakunaqa reparanku cheqaqtapunichu uyarishanchis icha manachu chayta. Huk superintendente viajante niran: “Pacienciawan uyariqtinchisqa hukkunapas uyariwallasunchistaq, chhaynapi rikuchisun hukkunapi interesakusqanchista”, nispa. Hukkunata uyarispanchisqa paykunata respetashanchis, chhaynapi paykunapas usqhayllata uyarinqaku allin willakuykuna willasqanchista (Rom. 12:10).