Diosta servinankupaq hina Bibliamanta estudiota qosun wasi punkupi
1. ¿Imapaqmi Bibliamanta estudiota qonchis?
1 ¡Maytan kusikunchis estudiota qallarispa! Ichaqa Biblia estudiay munaqta tariyqa qallariyllaraqmi. Bibliamanta runakunaman estudiota qonchis Cristoq yachachisqan kanankupaq (Mat. 28:19, 20). ¿Imakuna yanapawasun chayta ruwananchispaq?
2. ¿Imaynatan Bibliamanta estudiota qoshanku wasi punkupi, ima raykun ancha allinpuni?
2 Askha ruwanayoq runakunawan: Kunan p’unchaypi runakunaqa askha ruwanayoqmi kanku. Wakin llaqtakunapiqa pisillan munanku qallariymanta pacha huk hora Biblia estudiayta. Paykunata yanapanapaqmi kallpachawaranchis wasi punkupi Bibliamanta estudiota qallarinanchispaq qonanchispaqpas. Qallariypiqa yaqapaschá pisillata estudiachisunman, iskay kinsa textokunallata, huk otaq iskay parrafokunallata huknin qelqanchismanta, yaqapaschá Enseña nisqa libromanta. Allintapuni ruwashanku wasi punkupi Bibliamanta estudio qoq publicadorkuna.
3. ¿Ima rayku wasi punkupi estudiasqanchis tiempota astawan yapananchis?
3 ¿Wasi punkupi Bibliamanta estudio qosqallanchiswanchu contentakunanchis? Manan. Qallariypi manaña unaytañachu estudiota qospa qhepasun chaypas, 1990 watamanta mayo killamanta Nuestro Ministerio del Reino, 4 paginapi nin: “Allintaña estudiayta qallarishaspa, wasiyoqpas astawan yachayta munaqtinqa, aswan unayta estudiawaqchis”, nispa. Kay ruwayqa allinpunin. Mana mikhusqa tullullaña erqechata mikhuchiymanta rimasunchis. Qallariypiqa yaqapaschá pisi pisillamanta mikhuchinanchis kanman, mikhuyta munanankama. Ichaqa, chhaynallata mikhuchisunchis chayqa, manan erqechaqa kallpachakunmanchu nitaq allintachu wiñanman. Chhaynallataqmi Bibliamanta yachachisqapas allin yachachinata necesitan, Diospa poqosqa kamachin kananpaq (Heb. 5:13, 14).
4. ¿Ima rayku ancha allinpuni wasinku ukhupi Bibliamanta estudio qoy?
4 Wasinkupi Bibliamanta estudiota qospa: Sapankupi estudio qoymi aswan allinqa, chayta ruwasunman wasinku ukhupi otaq hukneqpipas allin kaqtinqa, chhaynapin yachachisqaqa Diospa Siminta allinta yachanqa, entiendenqa ima (Mat. 13:23). Yachachiqpas preparanqa yachachinanta yachachisqanpaq hina. Hinaspapas estudiasqaykichis tiempota yapaspaqa Diospa Simin Qelqata aswan allinta t’aqwinkichis, kallpachakunapaq hina (Rom. 10:17).
5. ¿Imata ruwasunman wasi punkupi estudio qosqanchis wasinku ukhupi ruwakunanpaq?
5 ¿Imata ruwasunman wasi punkupi estudio qosqanchis wasinku ukhupi ruwakunanpaq? Askha kuti estudiasqaykichis qhepata, ¿niwaqchu sut’itapuni estudiasqaykichis tiempota yapanaykichispaq? Tapullawaqtaqmi mana reparachiq hinalla: “¿Kashanchu tiempochayki tiyaykuspa kayta t’aqwinanchispaq?”, nispa. Otaq nillasunmantaq: “¿May tukuyta kunan kay yachachikuymanta rimananchista munawaq?” nispapas. Manaña wasinkuman haykuchisunkichu chaypas, estudiashallaychispuni wasin punkullapipas. Huk kutipiña wakmanta tapuwaq.
6. ¿Servicionchispi, ima ruwayta hunt’ayta munanchis? ¿Imaynatan kunan yachasqanchis yanapawasunman chay ruway hunt’ayta?
6 Allin sonqoyoq runakunata maskhaspanchisqa manan qonqananchischu kayta: Runakunaman Bibliamanta estudiota qonchis Jehová Diosman qokuspanku bautizakunankupaq. Diosqa saminchanqan kallpachakusqanchista, paypa qowasqanchis llank’anapi chayta hunt’ananchispaq (2 Tim. 4:5).