Imaynatan qallarisunman estudiokunata punkukunapi, telefonowanpas
1, 2. ¿Imaynatan allichasunman Bibliamanta estudio qosqanchista, askha ruwanayoq runakunata yanapananchispaq hina?
1 Kunan p’unchay runakunaqa ruwanayoqpunin kashanku. Hinaña kaqtinpas, askhan yachayta munanku espiritual ruwaykunamanta. ¿Imaynata espiritualpi saqsachisunman Diosta maskhaqkunata? (Mat. 5:3.) Askha predicaqkuna wasi punkullapi otaq telefonollawan qallarinku Bibliamanta estudiokunata. ¿Mast’arisunmanchu llank’ayninchista kaykunata ruwaspa?
2 Bibliamanta estudiokunata qallariyta munaqtinchisqa allintapuni allichakunanchis, hinaspa atikuqtinqa qhawachisunmanmi imaynatan Bibliata estudiakun. ¿Imaynata kayta ruwasunman, maypitaq?
3. ¿Imanaqtin qhawachisunman qallariypi imayna Bibliamanta estudio kasqanta, imaynatataq ruwakunman?
3 Wasi punkupi. Bibliamanta rimay munaqkunawan tupaqtinchisqa, rikuchisunchis allichasqanchis parrafota, yaqapaschá kanman, huk kaq leccionpi qallariq párrafo ¿Imatan Dios munan ñoqanchismanta? sutichasqa folletowan, qallarisuntaq pacha. Parrafota leesunchis, tapuyta qhawasunchis, t’aqwisunchistaq huk otaq iskay textokunata. Chayta ruwakunman pisqa otaq chunqa minutollapi. Uyariqninchis munaqtinqa, paywan rimasunman hukpi kutimuspa qatiq parrafokunata t’aqwinanchispaq. (Hukllapi estudio qallarinanchispaq askha yanapaykunata tarisunchis 6 paginapi, enero de 2002 Reinopaq Servicionchispi.)
4. ¿Imaynata qallarisunman Bibliamanta estudiokunata wasi punkupi revisitata ruwaspa?
4 Chhaynallatataqmi ruwakunman estudio qallarinapaq revisita ruwaqtinchis. Ñawpaq kaq visitapi qhawachisunmanmi ¿Imatan Dios munan ñoqanchismanta? folletota, chaymantataq 2 kaq leccionpi 1, 2 parrafokunawan yachachisunman iman Diospa sutin kasqanta. Hukpi kutimuqtinchistaq t’aqwisunchisman 3, 4 parrafokunata Jehováq kayninkunamanta yachachinanchispaq Bibliaq nisqanman hina. Kinsa kutitaña kutimushaqtinchistaq 5, 6 parrafokunata 5 paginapi fototawan t’aqwisunman, chaykunawan rikuchisunman imaynan Bibliamanta yachayqa yanapawanchis Jehová Diosta aswan allinta reqsinanchispaq. Kay estudiokunata ruwakunman wasin punkupi sayaspalla.
5, 6. a) ¿Imarayku wakin runakuna Bibliata yachayta munankuman telefonowan? b) ¿Imata nisunman telefonowan estudiota munachinapaq?
5 Telefonowan. Wakin runakunapaqqa yaqapaschá aswan allin kanman telefonowan Bibliamanta yachay, noqanchiswan uyapura estudiaymantaqa. Uyarisunchis kay willakuyta. Huk pananchis wasin-wasinta predicashaspas rimaran wawayoq askha ruwanayoq sipaswan, llank’aqraqtaq karan. Wasinta kutiqtin mana tarispataq, telefononman waharan. Chay sipastaq willakuran Bibliata estudianapaq mana tiempoyoq kasqanta. Ichaqa pananchis niran: “10 otaq 15 minutollapi yachallawaqmi imallatapas telefonollawan rimaspa”, nispa. Sipastaq niran: “Telefonollawan kaqtinqa allinmi kanman”, nispa. Chhaynapin ratulla qallariranku estudiayta.
6 ¿Munankumanchu wakin visitasqanchiskuna telefonowan estudiayta? Pananchis hina noqanchispas ruwasunman otaq nisunmanmi: “Munaqtiykiqa, telefonowan Bibliata yachaykusunman. ¿Allinchu kanman qanpaq?”, nispa. Bibliamanta yachachisqanchista, hukkunapaq hina allichaspaqa yanapasunmanmi ‘Diosta reqsinankupaq’ (Pro. 2:5; 1 Cor. 9:23).