Hukkunapi interesakusun allinmi nispa
1 Tukuy sonqowan allinpuni niyqa runakunata kallpachan, sonqontataq kuyurichin ruwananpaq, anchatataq kusichinpas. Askha publicadorkunan kayta reparanku: runakunata pisillapipas allinmi niqtinchisqa predicasqanchista uyarinqaku. ¿Imaynata chayta ruwasunman allin willakuykunata predicaspa?
2 Makilla kasun: Jesusqa, hanaq pachapiña kashaspa, repararanmi Asia provinciapi kaq qanchis congregacionkunaq allin ruwasqankuta (Apo. 2:2, 3, 13, 19; 3:8). Chhaynallataqmi noqanchispas, llaqtanchispi kaq runakunapi sonqomanta interesakuspanchisqa, makilla kasunchis allinmi ninapaq. ¿Ima nisunmantaq huk huertata sumaq allichasqata rikuspa, huk taytata wawanta munakuqta rikuspa, otaq huk runa asirikuspa napaykuspa sumaqta chaskiwasunman chayqa? ¿Manachu chaykunata rikuspa allinpuni nisunman?
3 Tukuy yuyaywan uyarisun: Predicaspanchisqa runakunata tapuykusun kutichiwananchispaq hina, hinaspataq respetasqanchista rikuchisun tukuy yuyaywan uyarispanchis (Rom. 12:10). Paykunaqa niwasunpaschá imatapas sonqomanta allinmi ninanchispaq hina, chhaynapin rimasqanchista tupachisun.
4 Allin reparaq kasun: ¿Imaynatan kutichinanchis pipas Bibliamanta pantasqata rimaqtin? Usqhaylla ‘manan chhaynachu’ ninamantaqa aswanpas agradecekunanchismi chay niwasqanchismanta, hinaspa nisunman, reparanin chaypi allin yuyaykusqaykita, nispa, chaymantataq rimashallasunman (Col. 4:6). Sichus chay yuyaykusqanmanta astawan rimayta munanman chayqa, nisunmanmi: allinmi chay temamanta rimay munasqaykiqa, nispa. Chhayna rimayqa llanp’uyachinmanmi mana uyariq hina kaq runakunata (Pro. 25:15).
5 Allinmi nisqanchisqa sonqomanta kanan runakunaq sonqonta kuyurichinanpaq. Chhayna rimasqanchisqa hatunchanmi Jehová Diosta, runakunatataq interesachin Reinomanta allin willakuykunapi.