Wasin wasin predicaymanta
1. ¿Imata tapukusunman wasin wasin predicaymanta, ima rayku?
1 Wasin wasin predicay ancha allinpuni kasqanmanta 1 de julio 1893 watamanta Zion’s Watch Tower (kunantaq La Atalaya) niran: “Cheqaq-kayta unayña predicaqkunaqa yachankun La Aurora del Milenio nisqa qelqawan wasin wasinta predicayqa kunan tiempopi aswan allin kasqanta”, nispa. Kunanpas teqsimuyuntinpi runakuna reqsinku Jehová Diospa testigonkunata wasin wasin predicasqankuwan. Askha suyukunapi manañataq runakunata wasinpi tarinchischu chayqa, ¿allinraqchu kanman wasin wasinta predicay?
2. ¿Bibliapi ima textokunan rikuchin wasin wasin predicana kasqanta?
2 Biblian kamachin, ancha allintaq: Wasin wasin predicayqa Bibliaq kamachisqanmi. Jesusqa iskay iskaymantan 70 yachachisqankunata runakunaq wasinman kacharan (Luc. 10:5-7). Bibliaq nisqan hina Jesuspa wañusqan qhepallatan yachachisqankunaqa “Dios yupaychana wasipipas iñiqkunaq wasinkunapipas [“wasin wasintapas”, NM] sapa p’unchay yachachishallaqkupuni [...] allin willakuykunata” (Hechos 5:42). Apóstol Pablopas kallpawanmi yachachiran wasin wasinta (Hech. 20:20).
3. Willay ima rayku wasin wasinta predicay aswan allin kasqanta.
3 Wasin wasinta predicayqa kunanpas ancha allinraqmi allin willakuykunata mast’arinapaq. Kayqa yanapawanchis allin runakunata allinta ‘maskhananchispaq’ (Mat. 10:11). Runakunaqa wasinkupin aswan thaklla kanku. Runakunawan uyapura rimaspaqa kunkanta uyarinchis, uyanta qhawanchis, muyuriqninpi kaqkunatapas rikunchis, chhaynapi reparanchis interesakushanchus icha manachus chayta, imamanta llakikusqantapas. Chaymantapas wasin wasinta predicaspaqa runakunawan astawanraq rimasun.
4. ¿Imaynatan aswan allinta predicasunman wasin wasinta?
4 Predicanayki runakunapaq hina allichakuy: Apóstol Pabloqa predicanan runakunapaq hina allichakuran ‘allin willakuykunarayku’ (1 Cor. 9:23). Chhaynallataq noqanchispas tiemponchista allichananchis runakunata wasinkupi tarinapaq hina, yaqapaschá tardenta, semana tukuyta, feriado p’unchaykunapipas. Wasipi mana pipas kaqtinqa qelqawaqmi chay wasiq direccionninta huk p’unchayta otaq huk horata kutinaykipaq.
5. ¿Imatan ruwasunman onqosqakunawanpas wasin wasinta predicanapaq?
5 Onqosqakunapas atinkumanmi wasin wasin predicayta. ¿Allichakusunmanchu onqosqakunawan kuska predicanapaq, atisqankuman hinalla purinapaqpas? Huk onqosqa pananchis kuskan horata hinaraqmi samanan karan sapa punkuta takananpaq, chaynaña kaqtinpas ¡maytan kusikuran wayqe-panakunawan kuska predicasqanmanta!
6. ¿Ima raykun wasin wasinta predicashanallanchispuni?
6 Tarishallanchisraqmi allin sonqo runakunata punkun punkunta predicaspa. Huk wayqenchista niranku: “Haykuykamuy, yachaniñan pi kasqaykita. Diosmanta mañakusharani yanapawaqniyta kachamuwananpaq, chayllamanmi punkuyta takaykamuranki. Diosmi uyariwaran chaymi kachamusunki”, nispa. Kaykunawanmi rikunchis Jehová Diospa wasin wasin predicay saminchasqanta (Mat. 11:19). Chay hinaqa, kallpachakushallaypuni wasin wasinta predicanaykipaq.