Pisilla interesakuqkunamanpas kutiy
1 Huk iñiqmasinchis Reinomanta allin willakuykunapi interesakusqanchista reparaspa, pacienciawan yapa-yapamanta kutimuwasqanchis raykun Diospa llaqtanpi kashanchis. Chhaynallataqmi noqanchispas kutinanchis pisilla uyarikuqkunamanpas. Runakuna Jesuspa ‘yachachisqankuna kanankupaqqa’, paykunamanmi sapa kutilla kutinanchis (Mat. 28:19, 20).
2 Reparay runakunaq interesakusqanta: Manaña qelqanchiskunata chaskikuyta munanmanchu chaypas, predicasqanchis runakunaqa interesakushankumanmi Reinomanta allin willakuykunapi, chaytaqa reparasunman imayna rimasqanpi, uyanpipas. Chaykunata reparaspaqa kutisunmanmi. Huk iñiqmasinchismi pisqa semana kutisqa huk wiraqochaman mana ima qelqata saqespa. Soqta kutipiñan chay wiraqocha huk qelqata chaskikusqa, qhepamantaq Biblia estudiayta qallarisqa.
3 Sichus huk runa uyarisunki chayqa, pisi tiempollamanta kutinayki, atikuqtinqa iskay kinsa p’unchayllamanta, ama chay runaq sonqonpi tarpusqaykita “saqra” aparapunanpaq (Mat. 13:19). Ima p’unchaychus kutinaykipaq nisqaykitaqa hunt’anaykipuni (Mat. 5:37).
4 Callekunapi predicaspa: Callekunapiña maypiña predicaspapas allinta uyarikuq runapiqa interesakunanchismi. Rimayta tukuspaqa kayta niwaq: “Sumaqtan rimarunchis. ¿Maypin tariykiman wakmanta rimanapaq?”, nispa. Wakin publicadorkunaqa yaqapaschá telefononpa numeronta qonkuman otaq ninkuman: telefonoykiq numeronta qoway noqapas qosayki, nispa. Huk hawallapi sapa kuti predicasqaykita runa rikuqtinqa willasunkimanmi telefononpa numeronta direccionnintapas. Manaña willasunki chaypas, sapa kuti paywan tupaspaqa rimapayawaqmi.
5 Anchatan kusikunchis qarpasqanchis, cuidasqanchis mallki t’ikariqtinqa. Chhaynatan kusikunchis kutisqanchis, yanapasqanchis runa espiritualpi wiñaqtinqa (1 Cor. 3:6). Chhaynaqa, kallpachakuy pisilla interesakuqkunamanpas kutinaykipaq.