Chaniyoq illatan Dios saqewanchis
1 Apóstol Pabloqa ancha chaniyoqpaq qhawariran predicay llank’ayninta, paypaqqa karan ‘chaniyoq illa’ hina (2 Cor. 4:7). Chay llank’ayninta hunt’ashaqtinmi askha sasachakuykunapi tarikuran, qatiykachasqa ima karan. Lliw tupasqan runamanmi mana sayk’uspa predicaran. Chaymantapas karu llaqtakunata puriran, manchana ñanninkunata lamar-qochanta ima. ¿Imaynatan noqanchispas apóstol Pablo hina ancha chaniyoqta qhawarisunman predicay llank’ayninchista? (Rom. 11:13.) ¿Imaynapitaq predicay llank’ayninchisri ima illamantapas aswan chaniyoq?
2 Aswan chaniyoq illa: Kay pachapi qhapaq kaykuna maskhayqa llakikuykunatan apamun, manataq wiñaypaqchu kanpas. Predicay llank’ayninchismi ichaqa wiñaypaq saminchaykunata qowanchis, noqanchismanpas runamasinchismanpas (1 Tim. 4:16). Chay llank’aywanmi runakunata yanapanchis Jehová Diosta reqsinankupaq, kawsayninkuta t’ikranankupaq, wiñay kawsay suyakuyniyoq kanankupaqpas (Rom. 10:13-15). Chay llank’ayninchista chaniyoqta qhawarisun chayqa, kusisqa sonqopas sonqo kawsasun, sumaq suyakuyniyoqtaq kasunpas (1 Cor. 15:58).
3 Illanchista ancha chaniyoqpaq hap’isun: Imatapas chaniyoqpaq qhawarinchis chayqa, chaymanmi qonchis tiemponchista kallpanchistapas. ¿Chhaynatachu predicay llank’ayninchisman tiemponchista kallpanchistapas qoshanchis? (Efe. 5:16, 17.) Ima ruwaykunamantapas espiritual ruwaykunamanmi tiemponchista astawan qonanchis. Predicay llank’ayninchis ancha chaniyoqtaq chayqa, tukuy sonqowanmi maypi tarikushaspapas predicana.
4 Sumaq illakunataqa runakunaq rikunanpin churakun, manan pakapichu. Predicay llank’ayninchista illata hina rikusunchis chayqa, ñawpaqmanpuni churasun (Mat. 5:14-16). Diosta sonqomanta agradecekuspan noqanchispas apóstol Pablo hina maypi tarikuspapas predicasun, chhaynapin predicay llank’ayninchista ancha chaniyoq illata hina hap’isunchis.