Jehová Diospaq llank’asqanchista chaninpaq qhawarisun
1. ¿Imaynatan runakuna predicasqanchista qhawarinku?
1 Saqraq munaychakusqan tiempopin kawsashanchis, chaymi askha runakuna predicasqanchista qhawarinku mana yuyayniyoq runakunaq ruwasqanta hina (1 Cor. 1:18-21). Mana cuidakuqtinchisqa, chay nisqankun pisipachiwasunman hinaspan manaña rawrashaq sonqowanchu predicasunman (Pro. 24:10; Isa. 5:20). ¿Imaraykun chaninpaq qhawarinanchis Jehová Diospa testigon kasqanchista? (Isa. 43:10.)
2. ¿Imaraykun nisunman predicacionninchisqa ch’uya llank’aymi nispa?
2 “Ch’uya llank’ay.” Chhaynatan nirqan apóstol Pablo predicacionmanta (Rom. 15:15, 16, NM). Chayta ruwaspan ch’uya Diospa llank’aysiq-masin kanchis, chhaynapin yanapakunchis sutin ch’uyanchakunanpaq (1 Cor. 3:9; 1 Ped. 1:15). Jehová Diosqa predicayninchistan qhawarin “yupaychay sacrificiota” hina (Heb. 13:15).
3. ¿Imaraykun predicacionninchis ancha allin ruwaypuni?
3 Allin willakuykunataqa manan llapan runakunachu predicanku, chayraykun may allinpuni predicación apariyqa. Angelkunaqa kusisqachá chaytaqa aparinkuman (1 Ped. 1:12). Paykunaqa allintapunichá chayta ruwankuman. Ichaqa Jehová Diosmi ñoqanchisman “t’uru mankakuna” hinaña kashaqtinchispas predicayta kamachiwarqanchis (2 Cor. 4:7).
4. ¿Imaynatan rikuchisunman predicacionninchista ancha allinpaq qhawarisqanchista?
4 Ñawpaqta ruwana. Predicacionta ancha allinpaq qhawarisun chayqa ima ruwaymantapas ñawpaqmanmi churasun, chaymi sapa semana predicaq lloqsisunchis (Fili. 1:10). Yuyaykuy kaypi: Sichus allin reqsisqa bandapi tocaq kasqanchista allinpaq qhawarisunman chayqa, sapa kutinmi preparakusunman sumaqta tocananchispaq. Chhaynallataqmi predicacionwanpas, sapa kuti predicananchispaqmi allinta preparakunanchis kallpachakunanchistaqmi ‘cheqaq-kay simita allinta yachachinanchispaq’ (2 Tim. 2:15; 4:2).
5. ¿Pikunan allinpaq qhawarinku predicasqanchista?
5 Runakunaq mana allin rimasqankuwanqa ama pisipasunchu. Predicasqanchis cheqaskunapi kanraqmi agradecekuq runakuna. Ichaqa manan runakunaq allin qhawarisqa kananchispaqchu predicanchis, aswanpas Jehová Dios allin qhawariwananchispaqmi. Yachanchismi ancha allinpaq chay predicasqanchista Jehová Dios qhawarisqanta (Isa. 52:7).