¿Imaynatan yanapasunman Jesuspa Wañusqanta Yuyarinapaq huñunakuyman hamuqkunata?
1. ¿Ima allin willakuykunatan uyarinqaku 2008 watapi 22 marzo p’unchayta?
1 2008 watapi 22 marzo p’unchayta millonninpi runakuna allin willakuykunata uyarinqaku. Jesuspa Wañusqanta Yuyarinapaq huñunakuyman hamuqkunan uyarinqaku imaynata Jehová Dios ancha munakuyninta rikuchiran kacharichiy sacrificiota qospa (Juan 3:16). Chaymantapas Diospa Reinonmanta uyarinqaku, imaynata chay Reinowan kay Hallp’api munayninta hunt’anqa chaytapas (Mat. 6:9, 10). Hinaspapas, sumaqta chaskiqtinchisqa reparanqaku munakuq kasqanchista huk nisqalla kawsasqanchistapas (Sal. 133:1).
2. ¿Imaynatan yanapasunman Jesuspa Wañusqanta Yuyarinapaq huñunakuyman hamuq Biblia estudiaqkunata?
2 Biblia estudiaqkunata: Wakin hamuqkunawanqa chayllaraqpaschá Biblia estudiayta qallarinchis, chhayna kaqtinqa wayqe pananchiskunaman reqsichisunman, willasunmantaq huñunakuyninchiskunaq imayna aparikusqanmanta, Huñunakuy Wasitapas allinta reqsichisunman. Hinaspapas discurso qoqmi Biblia estudiaqkunata kallpachanqa Jehová Diosman astawan asuykunankupaq, ñoqanchispas discursanteq nisqanta yapamanta rimarispa kallpachasunman.
3. ¿Imaynatan kallpachasunman iñiyninpi chiriyapuq wayqe pananchiskunata Jesuspa Wañusqanta Yuyarinapaq huñunakuyman hamusqankumanta?
3 Iñiyninpi chiriyapuqkunata: Hamullanqakutaqmi iñiyninpi chiriyapuq wayqe pananchiskunapas. Paykunatapas sumaqta napaykusunman. Ichaqa allin reparaqmi kananchis manan tapupayananchischu nitaq p’enqachinanchispaq hinachu rimapayananchis. Jesuspa Wañusqanta Yuyarinapaq huñunakuy qhepa p’unchaykunamanmi ancianokuna allichanqaku chay wayqe pananchiskunata watukunankupaq, hamusqankumanta sumaqta kallpachaykunqaku mink’anqakutaq huk huñunakuykunaman hamunankupaqpas.
4. ¿Imatan sapankanchis ruwananchis mana reqsisqa runakunata yanapananchispaq?
4 Hamuqkunata: Hamullanqakutaqmi reqsisqanchiskuna, familianchiskuna, mink’asqanchis runakunapas. Mana reqsisqanchis runakuna hamuqtinpas napaykusunmanmi nisunmantaq allinmi hamusqaykiqa nispa. Chayllaraqpaschá hamushan. Yaqapaschá willawasunman maypi tiyasqankuta, imayna tarinanchistapas, chhaynapi huk p’unchay wasinta rispa otaq telefonomanta waqyaspa astawan interesachisunman Bibliamantapas estudiota munachisunman.
5. ¿Imaynatan Bibliamanta estudiota qallarisunman?
5 Revisitata ruwaspa, Jesuspa Wañusqanta Yuyarinapaq huñunakuypi uyarisqanchis discursomanta rimaspa munachisunman ¿Imatapunin Biblia yachachin? nisqa librota. Ejemplopaq, discurso qoqmi leenqa Isaías 65:21-23 textota. Chay textomanta astawan rimaspa kayta nisunman: “Qhawariy, Jesuspa wañusqanraykun kay saminchaykunatawan chaskisunchis”, nispa. Chaypaqmi qhawachisunman ¿Imatapunin Biblia yachachin? nisqa libropi 4, 5 paginakunata. Otaq kayta nisunman: “Askhan tapukunku hayk’aqtaq hunt’akunqa chay profeciari”, nispa, chaymantataq qhawasunman 9 capitulota 1 parrafomanta 3 parrafokama. Otaq discursanteq nisqanmanta pisillata rimaspa munachisunman ¿Imatapunin Biblia yachachin? nisqa librota rikuchisunmantaq imaynata chay libroq yanapayninwan Bibliamanta yachanman chayta.
6. ¿Pikunatan yanapasunman Jesuspa wañusqanta yuyarispa?
6 Chhaynaqa llapallanchis kallpachakusunchis Biblia estudiaqkunata, iñiyninpi chiriyapuq wayqe pananchiskunata, wakin hamuqkunatapas yanapananchispaq (Luc. 22:19). Jehová Diosqa saminchawasunpunin munayninta ruwananchispaq kallpachakuqtinchisqa.