Imarayku kutishanallanchispuni

1. ¿Ima tapuymi kan predicayninchismanta?

¹ Askha cheqaskunapin sapa kutillan predicanchis. Manan munanichu uyariyta niqkunamanpas kutishallanchismi. ¿Imarayku mana uyarikuq runakunamanpas kutishanallanchis?

2. ¿Imaraykun aswantaqa predicashanallanchis?

² Jehová Diosta runamasinchistapas munakusqanchisrayku. Aswantaqa Jehová Diosta munakusqanchisraykun predicanchis. Sonqonchismi kallpachawanchis Diosninchismanta runakunaman willashanallanchispaq (Luc. 6:45). Jehová Diosta munakusqanchismi kallpachawanchis kamachikuyninkunata kasukunanchispaq, runamasinchistapas yanapanchis Diosta kasukunankupaq (Pro. 27:11; 1 Juan 5:3). Predicayninchispi hunt’anapaqqa manan runaq uyarinanmanta otaq mana uyarinanmantachu. Ñawpaq siglopi cristianokunaqa predicashallarankun qatiykachasqaña kaspankupas (Hech. 5:42). Mana pisipaspan predicashanallanchis manaña wakin runakuna uyariwaqtinchispas, chhaynapin rikuchinchis Jehová Diosta tukuy sonqomanta munakusqanchista.

3. ¿Imaynatan munakuy yanapawanchis predicashanallanchispaq?

³ Chaymantapas runamasinchista munakusqanchisraykun predicashallanchis (Luc. 10:27). Jehová Diosqa manan munanchu pipas chinkananta (2 Ped. 3:9). Sapa kuti predicasqanchis cheqaskunapipas tarishanchisraqmi Jehová Dios serviy munaq runakunataqa. Ejemplopaq, Guadalupe nisqa islapin 56 runamanta 1 Jehová Diospa testigonman tukupun, chhaynaña kaqtinpas qayna watan bautizakuranku 214 runakuna. Jesuspa wañusqanta yuyarinapaqpas huñunakuranku yaqa iskay chunka waranqa runakuna, chaypiqa 22 runamanta 1 riran chay huñunakuyman.

4. ¿Imaynatan predicasqanchis territorio cambiashallan?

⁴ Territorionchisqa cambiashallanmi. Manan kaq runakunallawanchu tupanchis territorionchispi predicaspaqa. Mana uyariwasqanchis wasiman kutispaqa yaqapas huk runawanñataq tupasunman, ichapas chay runaqa makilla uyariwasunman. Otaq predicasqanchis territorionchisman allin sonqoyoq runakuna astakamunman. Mayninpiqa tayta mamakunallan mana munankuchu Diospa Reinonmanta uyarikuyta. Wawakuna kuraqña kaspa wasinkumanta ripuspa ichapas makilla uyariwasunman predicasqanchista.

5. ¿Imaynapi tarikuspan runakuna uyarinkuman willasqanchista?

⁵ Runakunapas cambiashallankun. Apóstol Pablopas ñawpaqpiqa ‘millay k’amiq, iñiqkunata ñak’arichispan qatiykachaq’ runan karan (1 Tim. 1:13). Chay hinallataqmi kunan tiempopi wakin Jehová Diosta serviqkunapas karanku, mana uyarikuq, wakintaq hark’akuranku willasqanchista. Kay pachapi kawsayqa cambiashallanmi, chaymi mana uyarikuq runakunapas yaqapas qhepamanqa uyarinkuman willasqanchista. Wakinqa aswanta uyarikunkuman, familiankumanta pipas wañuqtin, llank’anankuta chinkachiqtinku, mana qolqeyoq kaspanku otaq onqoqtinkupas.

6. ¿Imaraykun tukuy kallpawan predicashanallanchis?

⁶ Kay pachaqa p’uchukayninmanñan chayashan, ichaqa Diospa Siminta willaypas yachachimuypas astawanmi yapakushan (Isa. 60:22). Chay hinaqa, predicashallasun tukuy kallpawan mana pisipaspa. Yaqapas hukkaq wasipi kaq runa uyariwasunman. Imaynaña kaqtinpas predicashallasunpuni. Chayta ruwaspan ‘kikinchista qespichikusunchis, hinallataq uyariqninchiskunatapas’ (1 Tim. 4:16).