Predicashallasun
1 Mayninpiqa nisunmanpaschá: “Kay llaqtapi runakunata askha kutitañataq predicani, manataq uyarikunkuchu chayqa, ¿imapaqñataq astawan predicayman?” nispa. Chaywanpas kanraqmi imarayku predicashanallanchispaq (Mat. 28:19, 20).
2 Yachanankupaqmi predicanchis: Jesuspa nisqan hina, kay pachapi millay kawsay “p’uchukapunanpaqña kashaqtinqa” allin willakuykunatan willakunan karan llapa runakunaq “yachananpaq” (Mat. 24:3, 14). Predicasqanchista rikuspan runakunaqa willasqaña hina kanku. Pasapunchisña chaypas wakin predicasqanchis runakunaqa rimashallankun willasqanchismanta, predicasqanchista rikumuqkunapas chaytapaschá ruwanku. Predicaypi mana pisipanapaqqa yuyarinanchismi imarayku predicasqanchista. Predicanchisqa Jehová Diosta kusichinanchispaqmi, Diospa phiñakuynin p’unchaymanta runakuna yachanankupaqpas (2 Tes. 1:6-9).
3 Mana pisipaspa predicayninchisqa allinpin tukunqa: Runakunaqa imaymanapin afanasqa kashanku, chaymi uyariwananchispaqqa mana pisipaspa predicashanallanchis. Huk señoramanmi wayqe pananchiskuna sapa semana visitallaqku, ichaqa punkullanpi rimaqku. Watamantañan wasinman haykuchisqa, chaypi Bibliamanta rimanankupaq. Anchata kusikuran Bibliamanta yachasqanwan, chaymi paykunawan Biblia estudiayta qallariran huñunakuykunamanpas riran, pisi tiempollamantataq bautizakuytaña munasharan.
4 Kay pachapiqa tukuy imapas cambiashallanmi, chaymi runakunapas cambiashallanku. Wakinqa manaña ñawpaqpi predicasqanchista uyarikurankuchu chaypas, kunanqa uyarikunkumanmi. Huk runallapas predicasqanchista uyarispa Dios serviyta qallarinqa chayqa, manan yanqapaqchu kanqa kallpachakusqanchisqa.
5 Runakunaqa aswan-aswantan llakikushanku kay pachapi “millay qhelli mana chanin ruwasqakunamanta” (Eze. 9:4). Astawanmi yapakushan predicaqmasinchiskuna, chaymi rikuchiwanchis allin sonqoyoq runakuna predicasqanchista kasukusqankuta (Isa. 2:2, 3). Chay hinaqa, tukuy sonqowan predicashallasun ‘allin willakuykunata’ (Isa. 52:7; Hech. 5:42).