¿Imaynapin yachanqaku?
1. ¿Imaraykun mayninpi sasa kanman predicay? Ichaqa, ¿imaraykun predicashanallanchis?
1 Jehová Diospa p’unchayninqa ñataq chayaramushanña chayqa, allintapunin runakunaman yachachinanchis Diospa munayninta, runakunapaq imachus munasqantawan (Juan 17:3, Edición 1988; 2 Ped. 3:9, 10). Wakin runakunaqa mana uyarikuq burlakuq iman kanku, chayraykun mayninpiqa sasa kanman predicay (2 Ped. 3:3, 4). Chhaynaña kaqtinpas wakinqa uyarikunqakuraqmi allin willakuykunata. Ichaqa, ¿imaynatan uyarinkuman pipas paykunaman mana willashaqtin? (Rom. 10:14, 15.)
2. ¿Imaraykun Pablo allin ejemplo ñoqanchispaq?
2 Ama pisipasunchu: Yachasqanchis hina, kashanraqmi uyariq runakunaqa, paykunaraykun mana manchakuspa predicashanallanchis. Chaypaq yachasunchis Filipos llaqtapi imachus pasasqanmanta. Huk kutinmi apóstol Pablo chay llaqtapi predicaq riran, chaypin paytaqa Silastawan mana kaqmanta tumpaspa k’aspikunawan waqtaranku, chaymantataq carcelman wisq’aranku (Hech. 16:16-24). Chhaynataña Pablota ruwaranku chaypas, payqa predicashallaranmi. Paytaqa Diosmi yanaparan espiritunwan, chayraykun Tesalónica llaqtata rispapas predicashallaran, chhaynapin chay llaqtapipas Diosta serviqkuna rikhuriranku (1 Tes. 2:2). Pay hinayá ñoqanchispas mana sayk’uspa allin kaqta ruwashallasun (Gál. 6:9).
3. ¿Imaraykun wakin runakuna uyarinkuman predicasqanchista?
3 Kay tiempopiqa cambiashallanmi runakunaq kawsayninqa, wakinmi mayninpi mana qolqeyoq rikukapunku, wakintaq onqosqa tarikapunku, wakinpataq familanku wañurapun otaq imapipas tarikunku (1 Cor. 7:31, NM). Chaymi unay watakunaña mana uyarikuqkunaqa chaykuna kasqanrayku kunanqa uyarikunku willasqanchista. Chaymantapas wakin wayna sipaskunaqa tayta mamankuq hark’asqanmi mana uyarikurankuchu, kuraq kapuspankun ichaqa uyarikunku. Chaymi manaraq tiempo tukukapushaqtin predicashanallanchis, ichapaschá paykunapas Jehová Diosta serviyta qallarinkuman (Rom. 10:13).
4. ¿Iman yanapawasun predicashanallanchispaq?
4 Predicashanallanchispunin: Jehová Diosta runamasinchiskunatawan munakuymi yanapawasun ñawpa tiempopi apostolkuna hina predicashanallanchispaq munaqkunaman yachachimunanchispaq ima (Hech. 5:42). Askha runakunan kay tiempopi “millay qhelli mana chanin ruwasqakunamanta llakikuspa khuyay” kashanku (Eze. 9:4). Bibliamanta allin willakuykunata uyarispankun ichaqa maytapuni kusikunku. Chaymantapas wakin runakuna manaña uyariwasunchu chaypas, Jehová Diosqa ancha allinpaqmi qhawarin kallpachakusqanchista, chaytan Biblia willan (Heb. 13:15, 16).