Jehová Diosta familiantin yupaychasun
1 Ñawpaq tiempopi Diospa kamachinkunaqa familiantinmi imaymanata ruwaqku. Aswantaqa familiantinmi Jehová Diosta yupaychaqku (Lev. 10:12-14; Deu. 31:12). Kunan tiempopin ichaqa familiakuna manaña kuskañachu imatapas ruwanku. Cheqaq cristianokunan ichaqa familiantin imaymanata ruwanchis, familiantinmi Diostapas servinchis. ¡Maytachá familia Paqarichiqqa kusikun tayta mamakuna wawankuwan kuska yupaychaqtinku!
2 Familiantin predicasun. Allin willakuykunata familiantin predicaspaqa astawanmi familianchisman hukllachakusun. Chayrayku congregacionpi umalliqkunaqa wayqe panakunawan predicanankumantapas, predicanallankutaqmi esposankuwan wawankuwanpas (1 Tim. 3:4, 5). Viajaq superintendentekunapas predicallankutaqmi esposankuwan.
3 Tayta mamankuwan predicaq wawakunaqa allin yachachiqmanmi tukunku. Paykunaqa rikunkun tayta mamankuq kusisqa predicasqankuta, Jehová Dios munakusqankuta, runamasinku munakusqankutapas (Deu. 6:5-7). Wawakuna waynayaqtinkupas sipasyaqtinkupas, askhataraqmi tayta mamankumanta yachankuman. Huk warmi qhari iñiqmasinchismi kinsantin wawankuwan lloqsillanpuni predicaq, sullk’a kaq wawanqa 15 watanpiña kashan, kurak kaqtaq 21 watanpiña kashan. Paykunaq taytan nin: “Wawaykunamanqa imallatapas yachachiykupunin. Munaykupuni predicaqtinku kusikunankuta, allin kallpachasqa kanankutapas”, nispa.
4 Familiantin preparakusun. Askha iñiqmasinchiskunan familiantin preparakunku predicanankupaq. Wawakunaqa kusikunkun predicanankupaq ensayokunata ruwaspanku, mayninpi huknin predicaqmanta ruwan huknintaq wasiyoqmanta hina. Wakin familiakunaqa sapa estudio tukuytan ensayanku predicanankupaq.
5 Astawanmi kusikuyninchisqa yapakun allin ruwaykunata familiantin ruwaqtinchis. ¡Ancha allinpunin familiantin wasin wasinta predicay, revisitakuna ruway, estudiokunata qoypas! Familiantin Jehová Diosta yupaychaspaqa kusikuywanmi nisunchis: “Ñoqaqa familiantinmi Señor Diosllatapuni servisaqku”, nispa (Jos. 24:15).