Qelqamanta Yachanapaq Huñunakuyqa allinninchispaqmi
1. ¿Imanaqtin allinpuni phisqantin huñunakuyninchiskuna?
1 Phisqantin huñunakuyninchiskunaqa manan kaqllachu. Ichaqa phisqantinmi allinpuni. Chay huñunakuykunapin ‘hukkuna hukkunawan kallpachanakunchis aswanta munanakunanchispaq, allin ruwaykunatapas ruwananchispaq’ (Heb. 10:24, 25). ¿Imanaqtinmi allinpuni Qelqamanta Yachanapaq Huñunakuy?
2. ¿Imanaqtinmi allinpuni huch’uy t’aqapi huñunakuykuna?
2 Allinpuni espiritualpi wiñanapaq. Qelqamanta Yachanapaq Huñunakuyqa huch’uy t’aqakunapin ruwakun, chaymi allinpuni iñiqmasinchiskunawan reqsinakunanchispaq, iñiyninchispi kallpachanakunanchispaqpas (Pro. 18:24). ¿Kallpachakushanchischu gruponchisman hamuqkunata reqsinanchispaq? Chaytaqa yaqapas ruwasunman sapankawan predicaq lloqsispa. Kay huñunakuypin umalliqkunaqa sapanka wayqe panakunata allinta reqsinkuman kallpachankumanpas (Pro. 27:23).
3. Qelqamanta Yachanapaq Huñunakuy, ¿imanaqtintaq allinpuni comentanapaq mosoqkuna hamunanpaqpas?
3 ¿Bibliamanta yachachisqanchis runakunata invitaranchisñachu kay huñunakuyman? Wakin yachachisqanchis runakunaqa manchakunkupaschá hatun huñunakuyninchiskunaman hamuyta, ichaqa kay huñunakuyninchis huch’uyllataq chayqa yaqapaschá hamullankuman, astawanqa wayqe panakunaq wasillanpi ruwakuqtin. Kay huñunakuypi pisillataq huñukunku chayqa, wayna sipaskunapas mosoqkunapas mana manchakuspan tapuykunata kutichinkuman. Hinaspapas chaypiqa askha kutitan siminchiswan Jehová Diosta hatunchasunman (Sal. 111:1).
4. ¿Imakunapaqwanmi allin kanman Qelqamanta Yachanapaq Huñunakuy?
4 Qelqamanta Yachanapaq Huñunakuyqa askha hawapi ruwakun allin akllasqa cheqaskunapitaq. Risqanchis grupo manaña wasinchis sispallanpichu kashanman chaypas, yaqapaschá Huñunakuy Wasimantaqa aswan sispallanpi kashan. Qelqamanta Yachanapaq Huñunakusqanchis wasipiqa huñunakusunmanmi predicanapaqpas.
5. ¿Imaynata yanapawasunman Qelqamanta Yachanapaq Huñunakuypi umalliq?
5 Allinpuni predicanapaq. Qelqamanta Yachanapaq Huñunakuypi umalliqqa llapa grupopi kaqkunata yanapan kusisqa tukuy sonqo predicanankupaq. Payqa kallpachakunmi sapankawan llank’ananpaq, servicionkupi yanapananpaqpas. Sichus mana atinchischu revisitakuna ruwayta chayqa, umalliqnichiswan rimananchis. Yaqapaschá allin yachachiq iñiqmasinchiswan kuskata llank’achiwasunman. Hinaspapas, huñunakuypi umalliqpa imayna yachachisqanta allinta qhawarispaqa aswan allintan Bibliamanta yachachisun estudiachisqanchiskunaman (1 Cor. 4:17).
6. ¿Imanaqtinmi rishanallanchispuni Qelqamanta Yachanapaq Huñunakuyman?
6 ¡May allinpunin Qelqamanta Yachanapaq Huñunakuyqa! Jehová Diosmi kay huñunakuytaqa qowanchis kay sasa tiempokunapi iñiyninchispi qaqata sayananchispaq (Sal. 26:12).