Kallpachanakusun
1. ¿Imapaqmi allinpuni congregacionta superintendenteq visitasqan?
1 Apóstol Pablon Roma llaqtapi kaq congregacionman qelqaran: “Qankunawan tupaykuytaqa munashanipunin, Santo Espirituq saminchayninwan qankunata yanapaykunaypaq, ahinapi iñiypi qaqatapuni sayanaykichispaq. Chay hinaqa, iñiyniykichismi kallpachawanqa, ñoqaq iñiyniytaq qankunata kallpachasunkichis”, nispa (Rom. 1:11, 12). Kay tiempopipas congregacionta visitaq superintendentewanqa anchatan ‘kallpachanakusunman’.
2. ¿Imanaqtinmi ñawpaqmantaraq willakun superintendenteq visitamunanta?
2 Imatan congregacionpi kaqkuna ruwankuman: Kinsa killa ñawpaqtaraqmi congregacionman willakun superintendenteq visitananta, chhaynapin ñoqanchisqa allichakusunman visitasqan semanapi allinta kallpachakunanchispaq (Efe. 5:15, 16). Hukpaq llank’anki chayqa yaqapaschá chay semanapi predicaq lloqsinaykipaq permisota mañakuwaq. Yaqapaschá chay killapi precursor auxiliar kawaq. Sichus chay semanakunapi viajasaq nisharanki chayqa, yaqapas huk p’unchaykunaña viajawaq.
3. Superintendente congregacionta visitamuqtin, ¿imata ruwasunman kallpachasqa kanapaq?
3 Superintendenteqa congregacionta visitan wayqe panakunata kallpachananpaqmi, predicacionpi yanapananpaqwan. Chayrayku allinpunin kanman paywan otaq esposanwanpas predicayqa. Superintendenteqa kusikunmi huk hukwan predicaspa, payqa predicallanpunin mosoqkunawanpas yanapana kaqkunawanpas. Sichus allin predicasqanta makilla qhawarisun, sumaq consejonkunatapas uyarikusun chayqa, allin predicaqmi kasun (1 Cor. 4:16, 17). Wasinchispi mikhunata invitaqtinchispas kallpachanakusunmanmi (Heb. 13:2). Hinaspapas, allinta uyarinanchis superintendenteq discursonkunata, payqa congregacionpa necesitasqanman hina discursokunata qon.
4. ¿Imaynatan superintendenteta kallpachasunman?
4 Superintendentepas necesitanmi kallpachanata: Apóstol Pabloqa waturikusqan wayqe panakuna hina imaymana sasachakuykunapi llakikuykunapi rikukuran. Chaymi payqa necesitaran kallpachanata, agradecekurantaq hukkuna kallpachaqtinku (2 Cor. 11:26-28). Huk kutinmi Roma llaqtapi tiyaq iñiqkuna uyariranku Pabloq chayamunanta, chaymi wakinqa 74 kilometrotaraq puriranku Apio nisqa Plazakama chaypi Pablowan tupanankupaq, payqa preson kasharan. “Pablotaq paykunata rikuspa, Diosman graciasta qorqan, hinaspan kallpachakurqan.” (Hech. 28:15.) Ñoqanchispas chay iñiqkuna hina superintendenteta kallpachasunman tukuy sonqowan visitapi yanapakuspa, chhaynapin ‘aswan allinpaq qhawashanchis’ superintendenteta (1 Tim. 5:17, NM). Rimayninchiswanpas ruwayninchiswanpas agradecekunanchis yanapawasqanchismanta. Wayqenchispas esposanpas anchatan kusikunqaku iñiyninchista, munakuyninchista, aguantasqanchistapas qhawaspanku (2 Tes. 1:3, 4).
5. ¿Imanaqtinmi llapallanchis necesitanchis hukkunaq kallpachawananchista?
5 Kay ‘sasa tiempokunapiqa’ llapanchismi necesitanchis hukkunaq kallpachawananchista (2 Tim. 3:1.) Kunanmantapacha allichakusun superintendenteq visitasqan semanapi tukuy sonqowan yanapakunanchispaq. Publicadorkunapas superintendentepas sumaqtan kallpachanakusunman. Chayta ruwaqtinchismi hukkuna hukkunawan sonqochanakusun iñiypipas wiñachinakusun (1 Tes. 5:11).