“Rawrashaq sonqowan” predicasun
1. ¿Imaynatan predicananchis?
1 Jehová Diospa munaynintaqa tukuy sonqomantan ruwananchis, manan hunt’ananchis raykullachu. Chayraykun Biblia niwanchis: “Rawrashaq sonqowan Señorta serviychis”, nispa (Rom. 12:11). Chaywanpas, sasachakuykunan pisiyachinman tukuy sonqomanta predicayninchista. Chayraykun kallpachakunanchis “rawrashaq sonqowan” predicashanallanchispaq. ¿Imatan chaypaq ruwana? (2 Tim. 1:6, 7).
2. Sichus Bibliata allinta estudiasun chayqa, ¿imaynatan predicasun?
2 Bibliata allinta estudiasun: Allin predicaqqa munakunmi Diospa Siminta, anchatataqmi kusikun chaypi tarisqan sumaq yachaykunawan (Sal. 119:97). ¿Manachu anchata kusikurqanchis Bibliata estudiaspa sumaq yachaykunata tarisqanchiswan? Chhayna kaqtinqa astawanchá Diosta munakurqanchis, hinaspa kallpachakurqanchis tukuy sonqowan paymanta willamunanchispaq (Heb. 13:15). Chhaynaqa, tukuy sonqomanta predicaspan rikuchinchis allin willakuykuna willayta ancha allinpaq qhawarisqanchista.
3. ¿Imaynatan Diospa santo espiritun yanapawasunman predicayninchispi?
3 Mañakusun santo espirituta: Tukuy sonqowan Jehová Diospa munayninta ruwananchispaqqa manan kallpallanchiswanqa atisunmanchu, chaypaqqa Diospa santo espirituntan sapa p’unchay necesitanchis (1 Ped. 4:11). Chayraykun ‘sinchi atiyniyoq’ Diosmanta mañakunanchis kallpanta, chhaynapin mana manchakuspa predicasun (Isa. 40:26, 29-31). Apóstol Pablopas chaytan ruwasqa sasachakuykunapi tarikuspa, chaymi nirqan: ‘Diosmi yanapawarqan’, nispa (Hech. 26:21, 22). Chhaynatan ñoqanchistapas Diospa santo espiritun yanapawasunman rawrashaq sonqowan predicanapaq. Chayraykun Diosmanta mañakunanchis (Luc. 11:9-13).
4. ¿Imaraykun allinpuni tukuy sonqowan predicay? Ichaqa, ¿imatan mana ruwanachu?
4 Rawrashaq sonqowan predicasunchis chayqa, cristianomasinchiskunapas kallpachakunqakun chhaynata predicanankupaq (2 Cor. 9:2). Predicasqanchis runakunapas aswan allintan uyarikunkuman tukuy sonqowan rimapayaqtinchisqa. Chhaynaña kaqtinpas, mana phiñachiq hinalla, llamp’u-kaywanmi predicananchis (Tito 3:2). Lliw runatan respetananchis, manataqmi atipakuspachu uyarichikunanchis.
5. ¿Bibliapi ima nisqantan kasunanchis?
5 Chhaynaqa, rawrashaq sonqowanpuni allin willakuykunata willasun. Chaypaqtaq kallpachakusun allintapuni Bibliata estudiananchispaq, Jehová Diosmantapas tukuy sonqowan espiritunta mañakunanchispaq. Chhaynapin ‘santo espirituq kallpachasqan mana iskayrayaspa’ Diosmanta willashallasun (1 Tes. 1:5).