Kikinkupunin uyarinqaku rikunqakupas
1. Discurso uyarisqankumantapas, ¿imatawanmi chay huñunakuyman hamuqkuna rikunqaku?
1 Kallpachakushanchismi Jesuspa Wañusqanta Yuyarina huñunakuyman askha runakunata invitanapaq. Ichaqa munanchismi uyarisqankupas rikusqankupas sonqonkuman chayananta. Huk señoran Jesuspa Wañusqanta Yuyarina huñunakuyman risqan qhepaman nirqan: “Chay huñunakuypin llapallanku sumaq runakuna kasqaku, huñunakusqanku localpas ancha munaymi kasqa paykuna kikinkutaq sumaqta cuidasqaku”, nispa. ¿Imatan chaymanta yachanchis? Discurso qoqmantapas llapallanchismi Diospa llaqtanta allinta qhawarichinanchis ruwasqanchiswan rimasqanchiswanpas (Efe. 4:16).
2. ¿Imaynatan visitamuwaqninchiskunata chaskinanchis?
2 Sumaqta invitadokunata chaskisun. Visitamuwaqninchiskunata kusisqa napaykusun chayqa ancha allinmi kanqa (Juan 13:35). Manaña llapankuwanchu parlayta atinki chaypas, ladoykipi kaqman sutiykita willay (Heb. 13:1, 2). Makilla kashay yaqapaschá pipas chayllaraq hamushan invitacionta chaskikusqanrayku. Khaynatan tapuwaq: “¿Chayllaraqchu visitamuwashankiku?” nispa. “Arí” niqtintaq, qanwan kuska tiyananpaq invitay chhaynapi ima tapuytapas ruwanasuykipaq. Sichus usqhaylla lloqsinaykichis kashan huk iñiq t’aqa huñukunanrayku chayqa, niwaqmi: “Yachaytan munani kay huñunakuyta imayna qhawarisqaykimanta, ¿maypin tariykiman hukmanta parlarinapaq?” nispa.
3. ¿Imatan ruwasunman iñiyninkupi chiriyapuqkuna allin chaskisqa kanankupaq?
3 Sumaqta chaskisun iñiyninkupi chiriyapuqkunata. Yaqapaschá askha chiriyapuq iñiqmasinchiskuna hamunqaku wakinqa watapi huk kutillata chay huñunakuyman riqkunapas. Sumaqta paykunata chaskisun chhaynapin yachanqaku paykunapi interesakusqanchista (Rom. 15:7). Chay qhepamantaq umallikuna paykunaq wasinkuta rinkuman huñunakuyman rinankupaq kallpachariq. Diosmantan mañakuyku chay huñunakuyman riqkuna uyarisqankuwan ‘allin ruwasqanchista rikusqankuwanpas’ Jehová Diosta hatunchanankupaq (1 Ped. 2:12).