20 octubre killamanta 16 noviembre killakaman mosoq tratadota rakisun
1 Lunes 20 octubremantan tawa semanantin rakisunchis ¿Hayk’aqllapas kaykunata tapukurankichu? nisqa mosoq tratadota; chaytaqa pachantinpin rakikunqa. Chay tratadota rakispan askha runakunata yanapasun cheqaq yachachikuykunata Diospa Simin Qelqapi maskhanankupaq (Juan 17:17).
2 Chay mosoq tratadoqa kay tapuykunatan kutichishan: ¿Yuyarikunchu Dios ñoqanchismanta? ¿Hayk’aqllapas tukunqachu guerrakuna llakikuykunapas? ¿Maypipas wañupuqkuna kawsashankumanraqchu? ¿Hayk’aqllapas wañuqkuna kawsarimpunkumanchu? ¿Imaynatan Diosmanta mañakunanchis uyariwananchispaq? ¿Imatan ruwananchis kusisqa kawsananchispaq? nisqatawan. “Cristianon kayku” niq religionkunapas manan chay tapuykunataqa allinta kutichiyta atinkuchu. Mana cristiano runakunapas yachaytan munanku chay tapuykunamanta, ichaqa manapaschá yachankuchu Biblia chaykunamanta yachachisqanta. Chayrayku askha runachá chay tratadoq nisqanmanta yachayta munanqaku.
3 Predicananchis llaqtapi llapanman rakisun: Llapan runakunamanmi wasinkupipuni chay tratadota qonanchis. Ichaqa predicananchis llaqta sinchi hatun kaqtinqa qallariymantapachan tratadota saqesunman mana pitapas tarisqanchis wasikunapi, umalliqkunan chayta qhawarinanku. Chay tratadotaqa qosunmanmi wasimasinchiskunaman, familianchiskunaman, llank’aqmasinchiskunaman, escuelapi compañeronchiskunaman, pi reqsisqanchismanpas. ¿Kallpachakusunmanchu octubre otaq noviembre killapi yanapakuq precursor (precursor auxiliar) kanapaq? Sichus wawaykikuna otaq estudiachisqaykikunapas predicaq kanankupaq hunt’ashankuña chayqa, umalliqkunawan rimawaq, ichapas predicaytaña qallarinkuman.
4 ¿Imanispan rakisunman? Llapan runaman tratadota chayachinapaqqa pisillatan sapankawan rimana. Tratadopi huknin tapuyta qhawachisunman hinaspa kutichiyninta leesunman. Chhaynata ruwaspaqa predicasqanchis runakunapaq hina rimayta atisun. Sichus pipas astawan yachayta munanqa chayqa, sutinta maypi tiyasqantawanmi anotananchis, hinaspa kallpachakunanchis kutinanchispac. Sabadonpi domingonpitaq revistakunatawan kuskata chay tratadota saqesunman. 16 noviembre killamantaqa ¿Imatapunin Biblia yachachin? nisqa librotan munachisun, puchuq tratadokunatataq wakin tratadokunata hina munachisunman.
5 Mosoq tratadowan estudiota qallarisunchis: Mosoq tratadoqa kusapunin kashan estudiota qallarinanchispaq. ¿Imatan ruwananchis? Pimanpas kutishaqtinchisqa tapusunmanmi tratadoq mayqen yachachiynin sonqonpaq hina kasqanta, hinaspa qhawachisunman tratadoq tukuyninpi qelqasqata, chaypin willashan Biblia estudiaymanta; hinaspa qosunman ¿Imatapunin Biblia yachachin? nisqa librota. Chaymantataq mayqen capitulomantachá yachayta munashan chaymanta hukta otaq iskay parrafokunata qhawachisunman.
6 Jehová Diosmi kamachiwanchis ‘espiritupi cheqaq-kaypiwan’ payta serviy munaq runakunata maskhananchispaq (Juan 4:23, 24). Ñoqanchisqa munanchismi chay runakuna Diosmanta yachaspa payta servinankuta, chayrayku kallpachakusun mosoq tratadota rakinanchispaq.