Hukniraymi kapunqa wakin huñunakuyninchiskuna
1, 2. 2009 watapi enero killamantapacha, ¿imaynatan aparikunqa wakin huñunakuyninchiskuna?
1 Kay watapi 21 abril killamanta 27 p’unchaykaman pachantinpi wayqe panakunapaq huk willakuy karan, chaypin niran: “2009 watapin 1 enero killamantapachan Qelqamanta yachanapaq huñunakuy aparikunqa Bibliamanta allin yachachiq kanapaq Escuelawan hinallataq Runaman Diosmanta yachachinapaq huñunakuypiwan kuska. Manañan Qelqamanta yachanapaq huñunakuy nispachu sutichakunqa, aswanmi Biblia Estudiayninchis nispa sutichakunqa”, nispa.
2 Huk huñunakuyllan kinsaman t’aqasqa kanqa: Chay huñunakuyqa llapachanmi huk hora tawa chunka phisqayoq minutollapi ruwakunqa, takikunantin mañakuykunantin ima. Takiwan mañakuypiwanmi qallarinqa (chayqa 5 minutollapin kanan); chaymantataq Biblia Estudiayninchis kanqa (chayqa 25 minutollapin kanan). Chay qhepamantaq Bibliamanta allin yachachiq kanapaq Escuela aparikunqa (chayqa 30 minutollapin kanan). Chay escuela tukuqtintaq huk takita takikunqa (chayqa 5 minutollapin kanan), chay takiwanmi qallarikunqa Runaman Diosmanta yachachinapaq huñunakuy (chayqa 35 minutollapin kanan). Tukunapaqtaq huk takita takikunqa, chaymantataq mañakuy kanqa (chayqa 5 minutollapin kanan). Llapa chaykunata preparakuqtinchis mana sasachakuy kananpaqmi Reinopaq Servicionchispi sapa killa lloqsimunqa chay huñunakuy imayna aparikunanmanta willakuykuna.
3. ¿Imaynatan ruwakunqa Biblia Estudiayninchis?
3 ¿Imaynatan ruwakunqa Biblia Estudiayninchis? Imaynan Qhawaq revistatapas estudianchis chhaynatan chay estudiayqa ruwakunqa. Manañan yuyarichikunqañachu ñawpaq semanapi estudiasqanchista, aswanmi pisillata rimaspa qallarikullanqaña. Llapa chaypi kaqkunapas pisillapin tapuykunata kutichinanku. ¿Pin Biblia Estudiayninchispi umallinqa? Superintendente presidente nisqa umalliqmi huk listata ruwanqa umalliqkuna sapa semana turnanakunankupaq.
4. ¿Imallan hukniray kanqa Runaman Diosmanta yachachinapaq nisqa huñunakuyninchispi?
4 ¿Imaynan kanqa Runaman Diosmanta yachachinapaq huñunakuyninchis? Chayqa kaqllan kanqa, willaykunan ichaqa phisqa minutollapi ruwakunqa, chaypiqa allin willakuykunata hinallataq sucursalmanta apachimusqanku allin cartakunata imallan willakunqa. Maypi predicanamanta, ima horasta predicanamanta, huñunakuna wasi pichanamanta, cuentamanta, sucursalmanta wakin cartakunamantapas willakuykunaqa manañan huñunakuypiñachu willakamunqa. Chaykunataqa willakuykunata k’askachina tablapin k’askachikunqa llapanku leenankupaq. Llapa rimaqkunapas yachachiqkunapas allintan preparakamunanku, manan pipas tiempontaqa pasananchu aswanmi sapanka yachachimunan paykunapaq tiempo kasqanman hinalla. Chaymantapas imayna yachachinapaq willakuykuna kasqanman hinallan yachachinanku.
5. ¿Imaynatan huñunakuyninchiskuna aparikunqa watukuq umalli hamuqtin?
5 ¿Imaynan kanqa iñiq t’aqakunata watukuq umalliqpa watukuynin? Chayqa kaqllan kanqa, manan imapipas cambianqachu. Martes ch’isintan aparikunqa Bibliamanta allin yachachiq kanapaq Escuela hinallataq Runaman Diosmanta yachachinapaq nisqa huñunakuy ima. Chaykuna tukuqtinmi huk takita takikunqa, chaymantataq waturikuq umalli kinsa chunka minutollapi allin yachachikuykunata yachachiwasun. Sapaqtan huñunakusun Biblia Estudiayninchis aparikunanpaqqa, chay tukuqtinpas huk takitan takikunqa, chaymantataq waturikuq umalli willawasun allin yachachikuykunamanta. Chay huñunakuyta tukunapaqqa takitan takikunqa, chaymantataq mañakuy kanqa.
6. ¿Imatan ruwanqaku predicaq t’aqakunata umalliq wayqekuna?
6 ¿Predicanapaq huñunakuyri imaynataq kanqa? Llapa umalliqkunan huñunakuspa kamachinakunanku mayqenninkuchus predicaq t’aqakunata pusarinankupaq michinankupaq ima. Sichus chayta ruwananpaq huk yanapakuq wayqeta (siervo ministerial) akllanqaku chayqa “predicaq t’aqata yanapakuq” nispan sutichakunqa.
7. ¿Imaraykun kinsaman t’aqasqa huñunakuyninchis allinpuni kanqa?
7 Kaypi yachasqanchis hina, chay kinsaman t’aqasqa huñunakuyninchispiqa askha imaymanakunatan yachasunchis, kallpachanakusunchis ima. Chay huñunakuypi yachasqanchisqa anchatan yanapawasunchis allin predicaq, allin yachachiq ima kananchispaq, chhaynapitaqmi Dios serviyninchispi imapas ruwasqanchisqa allinpi tukunqa (Efe. 4:13, 14; 2 Tim. 3:17).
8. ¿Imanaqtinmi ñawpaqmantapacha allinta preparakamunanchis chay huñukuyninchispaq?
8 Sichus chay huñunakuypi llapa yachachikuykunata ñawpaqmantapacha allinta preparakamusunchis chayqa, tukuy yuyaywanmi uyarisunchis chaypi imaymana yachachisqankuta. Chay huñunakuypiqa llapanchismi kutichisunman tapukuykunata, chhaynapin hukkuna hukkunawan kallpachanakusunchis (Rom. 1:11, 12; Heb. 10:24). Sichus ‘iñiypi wiñasqanchista lliwpas sut’ita rikunankuta’ munanchis chayqa, ‘cheqaq-kay simita allin yachachiqkunan’ kananchis (1 Tim. 4:15; 2 Tim. 2:15).
9. ¿Imatan ruwaytapuni munanchis? ¿Imaraykun chayta ruwayta munanchis?
9 ¡Maytapunin kusikunchis kinsaman t’aqasqa huñunakuyninchismantaqa! Chayraykun “allin yuyayniyoq hunt’aq kamachi” ima nisqantapas kasukuytapuni munanchis, chhaynapi Allin Michiqninchis Jesuspa ladollanpi kananchispaq; paymi allinta preparawashanchis ‘manchay ñak’ariy’ p’unchaypaq, chay p’unchayqa ñan chayaramushanña (Mat. 24:21, 45; Heb. 13:20, 21; Apo. 7:14).