¿Imakunatan ruwakunan predicacionman lloqsinapaq huñunakuypi?
1. ¿Imapaqmi ruwakun predicacionman lloqsinapaq huñunakuykuna?
1 Huk kutinmi Jesús huñunakurqan 70 qatikuqninkunawan predicaq rinankupaq (Luc. 10:1-11). Chaypin paykunata nirqan mana sapallankuchu kashasqankuta, aswanpas “chakrayoq” Jehová Dioswan kashasqankuta. Chaymantapas yachachirqanmi imayna predicanankuta, iskay-iskaymanta predicanankupaqtaq nirqan. Kay tiempopi predicacionman lloqsinapaq huñunakuypas kaqllataqmi: kallpachawananchispaq, yachachiwananchispaq, organizasqa predicananchispaq ima.
2. ¿Hayk’a tiempopin ruwakunqa predicacionman lloqsinapaq huñunakuy abril killamanta?
2 Predicacionman lloqsinapaq huñunakuykunaqa kunankaman ruwakushan 10 otaq 15 minutopi. Chaypin qhawarikun mayqen territoriokunata predicakunanta, oracionta iman ruwakun. Abril killamantan ichaqa 5, 7 minutokunallapi ruwakunqa. Sichus chay ñawpaqllata huñunakurqanku chayqa aswan pisi tiempollapin ruwananku, chayllaraq huñunakuymanta lloqsimusqankurayku. Chay hinapin aswan askha tiempo kanqa predicanankupaq. Chaymantapas sichus precursorkuna otaq publicadorkunapas ñawpaqtaña predicayta qallarirqanku chayqa manan nishu tiempotachu usuchinqaku.
3. ¿Imaynatan ruwakunan predicacionman lloqsinapaq huñunakuy?
3 Predicacionman lloqsinapaq huñunakuykunaqa publicadorkunaq allinninpaqmi ruwakunan. Iñiq t’aqakunan qhawarirqanku grupokunapi predicay allin kasqanta, chhaynapin predicacionman lloqsinapaq huñunakuykunata sapanka grupo ruwanku wasinku cercallapitaq predicankupas. Grupo umalliqkunapas sapanka hermanotan qhawarinku imayna kashasqankuta. Ichaqa iñiq t’aqapi umallikunan qhawarinanku iman aswan allin kanman llapa hermanokunapaq chayta. Manaraq oracionwan tukushaspan sapanka hermanokuna yachanankuña mayninta predicanankuta piwan predicanankutapas.
4. ¿Imaraykun predicacionman lloqsinapaq huñunakuypas ancha importante?
4 Huk huñunakuykuna hina importanten predicacionman lloqsinapaq huñunakuykunapas. Kay huñunakuymanqa rinanku pikunachus chay p’unchaypi predicaq lloqsinqaku chaykunallan, manan llapa iñiq t’aqachu. Ichaqa manan nishanchischu chay huñunakuytaqa yanqa-yanqallatan ruwakunan nispachu. Kay huñunakuypas huk huñunakuykuna hinallataqmi Jehová Diospa regalon. Chaypin “hukkuna hukkunawan kallpachanakunchis aswanta munanakunanchispaq, allin ruwaykunatapas ruwananchispaq” (Heb. 10:24, 25). Chayraykun umalliqkunaqa allinta preparakunanku chay huñunakuypaq, chay hinapin Jehová Diosta hatunchanqaku predicaq hermanokunapas allin preparasqan lloqsinqaku. Llapa predicacionman lloqsiqkunapas kallpachakunankun chay huñunakuyman tempranota chayanankupaq.
Predicacionman lloqsinapaq huñunakuytaqa manan yanqa-yanqallantachu ruwakunan, nitaqmi pisipaqchu qhawarina
5. a) ¿Imakunatan ruwanan predicacionta qhawariq umalli predicanapaq huñunakuykuna allinta aparikunanpaq? b) ¿Imaynatan diriginkuman hermanakuna predicacionman lloqsinapaq huñunakuyta?
5 ¿Imaynatan preparakuna chay huñunakuypaq? Pipas allinta preparakunanpaqqa ñawpaqmantañan chaskinan asignacionninta. Chay hinallataqmi kanan predicacionman lloqsinapaq huñunakuypaqpas. Sapanka grupopi predicanapaq huñunakuytaqa huk umalliqmi aparinan otaq huk yanapaqnin. Sichus llapa iñiq t’aqa predicaq lloqsinqaku chayqa, predicacionta qhawariq umallin asignanan huk umalliqta chay huñunakuyta aparinanpaq. Predicacionta qhawariq wakin umallikunaqa sapanka grupopi umalliqmanmi qon huk programata chaytan tableropipas churallantaq. Chay huñunakuy allinta aparikunanpaqqa allintan preparakunanku, chay raykun predicacionta qhawariq umalliqa allinta akllanan pikunas chay huñunakuykunata aparinqaku chayta. Sichus huk p’unchaypaq predicacionta umalliq mana kanqachu chayqa, predicacionta qhawariq umallin asignanan allin experienciayoq hermanata (qhaway “Huk hermana chay huñunakuyta ruwanan kaqtin” nisqa willakuyta).
6. ¿Imaraykun allinta preparakunan predicacionman lloqsinapaq huñunakuyta apariq umalli?
6 Bibliamanta allin yachachiq kanapaq escuelapi asignacionta qowanchis chayqa ñawpaqmantañan allinta preparakunchis, manan huñunakuyman hamushaspallañachu. Chay hinatan predicacionman lloqsinapaq huñunakuypaqpas mana chay ratollachu preparakunanchis. Pisi tiempollataq huñunakuy ruwakunqa chayqa allintan preparakunanchis allinta yachachinapaq tiempollanpi tukunapaqpas. Chaymantapas ñawpaqmantañan maypi predicakunantapas qhawarina.
7. ¿Imakunamantan rimakunman predicacionman lloqsinapaq huñunakuypi?
7 ¿Imamantan rimasunman? Umalliq t’aqaqa manan huk bosquejotachu ruwamun kay huñunakuykunapaq, sapanka llaqta hukniray kasqanrayku. Ichaqa “¿Imakunamantan rimasunman predicacionman lloqsinapaq huñunakuypi?” nisqa recuadron chaypaq yanapawasunman. Chay huñunakuykunataqa uyariqkunaq yanapayninwanmi ruwakunqa. Mayninpitaq huk demostracionta ruwakunman otaq predicacionmanta willaq videokunata qhawankuman jw.org nisqamanta. Chay huñunakuyta umalliqqa preparakushaspan yuyaykunan imakunan hermanokunata yanapanqa chayta.
Predicanapaq huñunakuyta apariqqa preparakushaspan yuyaykunan imakunan yanapanman chay p’unchaypi predicaqkunata chaypi
8. ¿Imakunamantan rimasunman sábado domingo p’unchaykunapi predicacionman lloqsinapaq huñunakuypi?
8 Sábado p’unchaykunatan Qhawaq, ¡Rikch’ariy! revistakunawan predicakun. Wakin hermanokunaqa sábado p’unchayllapin predicaq lloqsinku, chaymi mayninpiqa qonqapunkumanña familiankuwan estudiashaspa predicanapaq preparakusqankuta. Chaymi huñunakuyta apariqqa Diosmanta Willasunchis hojanchispi kaq presentacionkunata yuyarichinan. Rimallasunmantaqmi revistakunata munachishaspa imaynata willarisunman noticiakunamanta otaq ima fiestakuna chay llaqtapi kashasqanmantapas. Chaymantapas rimasunmanmi revistata chaskikuqkunaman kutinanchispaq imakunata ninamanta. Mayninpiqa wakin predicaqkunan chay killapaq revistawan ña predicarqankuña, chayqa paykunatapas tapurisunmanmi imaynata chay revistawan predicashasqankuta otaq huk experienciata willankuman. Domingo p’unchaykunapipas chay hinatan ruwallasunmantaq chay killapi llank’ashasqanchis qelqakunawan. Predicacionman lloqsinapaq huñunakuypiqa rimallasunmantaqmi Allin willakuykuna, Diosta uyariy nisqa folletokunata otaq Imatapunin librotapas imayna munachinamanta.
9. ¿Huk mosoq tratadota otaq invitacionta chay killapi rakishaspa imamantan rimakunman predicacionman lloqsinapaq huñunakuypi?
9 Chay killapi huk mosoq tratadota otaq huk invitacionta rakispaqa sábado domingo p’unchaykunatan rimakunman imaynata revistakunatawan kuska munachinamanta. Pipas astawan yachayta munaqtin imata ruwanamantapas. Chaymantapas hermanokunan willankuman chay tratadokuna rakisqankumanta sumaq experienciakunata.
10, 11. ¿Imaraykun predicaq lloqsiqkunapas preparakunanku chay huñunakuypaq?
10 ¿Imaynatan predicaqkunapas preparakunkuman? Predicacionman lloqsiqkunapas ñawpaqmantañan preparasqa kananku chay huñunakuypaq, chay hinapin chay huñunakuy aswan allin kanqa. Chaypaqqa familiantin estudiasqanku ratopin preparakunkuman. Chaymantapas manaraq chay huñunakuy qallarishaqtinmi predicanapaq qelqakunata horqosunmanña, chay hinapi tempranota predicayta qallarinapaq.
11 Huk huñunakuykunapaq hinan kay huñunakuypaqpas kallpachakunanchis tempranota chayananchispaq. Tardeta chayaspaqa hukkunatan distraesunman, chaymantapas predicacionta umalliqmi cambianan kanman imaynata chay territoriota predicakunanta. Predicacionta umalliqqa yaqapaschá pisilla lloqsimuqtinku yuyaykunqa mana tukusqanku territoriota predicanankupaq. Karupi predicakunan kaqtintaq waynakunata otaq allin saludniyoq hermanokunata kachanqa. Tutapi otaq peligroso sitiokunapi predicakuqtintaq wakin hermanokunata ninqa hermanakunaq qayllallanpi otaq kuska predicanankupaq. Onqosqakunatataq ninqa pampallapi predicanankupaq. Allin experienciayoq hermanokunatataq ninman mosoqkunawan lloqsinanpaq. Tardeta chayasun chayqa tukuy chay yuyaykusqankunatan predicacionta umalliqqa cambianan kanman. Mayninpiqa yaqapaschá tardeta chayasunman ima urgenciapas kaqtin. Ichaqa sapa kutilla tardeta chayashanchis chayqa manapaschá valorashanchischu predicacionman lloqsinapaq huñunakuyta otaq mana allintachu tiemponchista organizashanchis.
12. Huk hermanollawan predicaq lloqsishanchis chayqa, ¿imapaqmi kallpachakunanchis?
12 Predicaqkunaqa rimankumanmi ñawpaqmantaña piwan predicanankuta otaq suyankuman predicayta umalliq ninanta. Ichaqa huk hermanollawan sapa kuti predicaq lloqsishanchis chayqa, ¿imatan ruwasunman? Kallpachakunanchismi hukkunawan predicananchispaq, chhaynapi hukkunawanpas reqsinakunanchispaq (2 Cor. 6:11-13). Chaymantapas mosoqkunawanmi predicasunman, chay hinapin yanapasun allin yachachiq kanankupaq (1 Cor. 10:24; 1 Tim. 4:13, 15). Chay huñunakuypiqa allintan uyarinanchis ima nimusqantapas, maypi predicananchispaq niwasqanchistapas. Huñunakuyta tukuspataq usqhaylla maypi predicananchisman rinanchis, tukuy niwasqanchisman hinataq predicananchis.
13. ¿Imaynapin allinninchispaq kanman predicacionman lloqsinanchispaq huñunakuypaq llapanchis preparakusqanchis?
13 Predicanankupaq Jesuspa kachasqan 70 qatikuqninkunaqa ‘kusisqan kutimpurqanku’ (Luc. 10:17). ¿Imarayku? Jesusmi paykunawan huñunakurqan manaraq predicaq lloqsishaqtinku, chaymi paykunataqa yanaparqan allinta predicanankupaq. Chay hinatan yanapawallanchistaq predicacionman lloqsinanchispaq huñunakuypas. Llapanchis chay huñunakuypaq kallpachakusun chayqa, llapa runakunaman predicananchispaqmi kallpachawasun, yachachiwasun, allin organizasqataq kasunpas (Mat. 24:14).