2010 watapaq huk p’unchay huñunakuyninchis
1. a) ¿Imamantan yachachikuran huk p’unchay huñunakuyninchiskunapi? b) ¿Imaynatan predicayniykipi yanaparasunki chhayna huñunakuykuna?
1 Ñawpa watakunapin huk p’unchay huñunakuyninchiskunapi yachachikuran: “Aswan allin kaqtapuni akllakuychis”, “Huk sonqolla allinta sayasun”, “Cheqaq-kaymanta willashallaychis”, “Ñoqanchisqa t’urullan kanchis Jehová Diostaq llut’aqninchis”, nisqa temakunamanta (Fili. 1:9, 10, 27; Juan 18:37; Isa. 64:8). Chayamunqañan 2010 watapaq huk p’unchay huñunakuyninchis, chaypin yachachikunqa 1 Corintios 7:29 textomanta. Chay textopin willashan pisilla tiempo kasqanmanta. Maytachá chay huñunakuyman riyta munashanchis.
2. ¿Imatan ruwana hayk’aqchus chay huñunakuy kananta yachaspa?
2 Huñunakuypin willakunqa hayk’aqchus chay huñunakuy aparikunanta, chaymantapachan familiaykita rimapayashanayki rinaykichispaq. Wakinqa calendariopin anotanku hayk’aqchus chay huñunakuy kananta, listapitaq churanku chaypaq imakuna necesitasqankuta. Chaymantataq wawankuwan kuska yupanku hayk’araqchus faltan rinankupaq chayta. Chaymantapas Familiantin Diosta Yupaychananku Ch’isintan qhawankuman chhayna huñunakuykunapi imakuna anotasqankuta. Qhawallankumantaqmi Benefíciese libropi 13-16 paginakunata. Chaypin willakushan ‘allinta uyarinamanta’ (Luc. 8:18).
3. ¿Imatan ruwananchis chay yachachikuykuna allinninchispaq kananpaq?
3 Yachasqanchista kasukusun: Chay huñunakuy tukuytan askha ninku: “¡Ima munaymi karan kaypi yachasqanchisqa!” nispa. Chhaynapunin Jehová Diospa yachachikuyninkunaqa (Pro. 10:22). Chaymi allinta chaykunapi yuyaymanananchis, sonqonchispipas hap’inanchis, chhaynapin allinninchispaq kanqa (Luc. 8:15). Chaymantapas wasinchisman kutimpushaspan familianchiswan otaq viajasqanchis carropi kaqkunawanpas rimasunman chay huñunakuy imapaq kallpachawasqanchismanta, imaynatachus predicaypi yanapawananchistapas. Chhaynapin yuyashallasun imachus yachasqanchista (Sant. 1:25).
4. ¿Imaraykun allinpuni kanqa chay huñunakuyninchis?
4 Pipas huk allin regalota necesitasqanchis ratopi qowasunman chayri, kusikusunmanmi riki. Chhaynallataqmi Jehová Diospas huk sumaq regalota qowasun chay huñunakuypi. Chaymi tukuy sonqowan chayta suyashanchis. Chay huñunakuypin hanaq pacha Taytanchisqa kallpachawasun yachachiwasuntaq paypa qowasqanchis llank’anata allinta hunt’ananchispaq (2 Tim. 4:2; Sant. 1:17).