¡Atiwaqmi escuelapi predicayta!
1. ¿Ima ruwanapaqmi allinpuni kanman escuelapi kay?
1 ¿Kay watallaraqchu escuelapi kashanki icha unayñachu? Imaynaña kaqtinpas, escuelapiqa imaymana sasachakuykunan kan cristiano wayna sipaskunapaq. Ichaqa escuelapi kayqa allinmi kanman predicanapaq (Juan 18:37). Chhaynaqa, ¿preparasqachu kashanki escuelapi predicanaykipaq?
2. ¿Iman yanapasunki escuelapi predicanaykipaq?
2 Qantaqa allintan yachachirasunkiku Jehová Dios, tayta mamayki, allin yuyayniyoq hunt’aq kamachipiwan; paykunaq yachachisqanmi yanapasunki tukuy imatapas allinta ruwanaykipaq (Pro. 1:8; 6:20; 23:23-25; Efe. 6:1-4; 2 Tim. 3:16, 17). Kunanqa allintañachá yachashanki imaynachus escuelapi kay kasqanta, chaymi kallpachakunayki Bibliamanta yachasqaykimanta predicanaykipaq (Pro. 22:3). Chaymantapas yanapasunkimanmi Los jóvenes preguntan nisqa librokuna, hinallataq ¡Despertad! nisqa revistapi wayna sipaskunamanta rimaq yachachikuykunapas.
3. ¿Imaynatan escuelaykipi predicawaq?
3 Imaymana ruwasqaykiwanmi escuelapiqa predicawaq: allin p’achakusqaykiwan, allichakusqaykiwan, allin rimasqaykiwan, sumaq sonqo kasqaykiwan, profesorniykikunata compañeroykikunata respetasqaykiwan, hinallataq allin notakunata horqosqaykiwan, allin yuyaywan kawsasqaykiwanpas. Ñapaschá tapurasunkiku imaraykus chhayna kasqaykita (Mal. 3:18; Juan 15:19). Chhaynata tapukuqtinkun kallpachakuwaq predicanaykipaq (1 Tim. 2:9, 10). Chaymantapas escuelaykipiqa kanqaraqchá imaymana fiestakuna. ¿Imanispan kutichiwaq: “Imaraykun mana participankichu”, nispa tapusuqtiyki? ¿“Manan religionniypiqa chayta ruwaykuchu” otaq “Jehová Diospa testigon kasqayrayku”, nispallachu niwaq? Manan riki. Aswanchá kallpachakuwaq munakuq Jehová Diosninchismanta willanaykipaq. Chaypaqmi allinta preparakunayki Jehová Diospa yanapaynintapas mañakunayki. Chhaynapin listo kashanki pitapas predicanaykipaq (1 Ped. 3:15).
4. ¿Imaraykun mana manchakunaykichu escuelapi predicayta?
4 Mayninpiqa manchakunkipaschá escuelaman riyta. Chhayna kaqtinqa yuyarinaykin mana sapallaykichu kasqaykita. Askhan qanwan kashanku yanapanasuykipaq. Chhaynaqa, atillankin escuelaykipi predicayta. ¡Ancha allinmi chay ruwayqa!