Ama manchakuychu predicayta
1. ¿Imanaqtinmi sasa kanman predicay?
1 Burlakunankuta manchakuspapaschá mayninqa mana escuelaykipi predicarqankichu. Chay ruwayqa sasapunin, astawanqa manchapakuq kasqaykirayku. Ichaqa qhawarisun iman yanapasunkiman chayta atipanaykipaq.
2. ¿Imaynatan allin yuyaywan predicawaq escuelaykipi?
2 Allin yuyaywan ruway. Escuelapiqa manan wasin-wasinta hinachu llapankuta predicawaq. Aswanpas allintan qhawarinayki ima ratos predicawaq chayta (Ecl. 3:1, 7). Yaqapaschá compañeroyki tapusunkiman imaraykus escuelapi wakin ruwasqankuta mana ruwankichu, tareata ruwaspa otaq imamantapas rimaspa iñiyniykimanta willawaq. Wakin cristianokunaqa chayllaraq escuela qallarishaqtinmi profesorninkuman willanku Jehová Diospa testigon kasqankuta, imapis iñinku chaykunamanta willaq qelqata ima qonku. Hukkunataq qelqanchiskunata alayripi churanku, chayta rikuspa mayqen compañeronkupas tapunanpaq.
3. ¿Imaynatan preparakuwaq escuelaykipi predicanaykipaq?
3 Allinta preparakuy. Sichus allinta preparakunki chayqa, mana iskayaspan kutichinki ima tapuymanpas (1 Ped. 3:15). Chaypaqmi ichaqa, ñawpaqmanta yuyaykunayki ima tapuykunatas ruwasunkikuman imaynatas kutichiwaq chaytapas (Pro. 15:28). Atispaqa Bibliata apay, Los jóvenes preguntan otaq Razonamiento nisqa librokunata, Diospa tukuy imaymana kamasqanmanta willaq qelqakunata ima. Chaymantapas tayta-mamaykitan niwaq familiantin estudiasqaykichispi chaykunamanta practicanaykichispaq.
4. ¿Imaraykun kallpachakushanallayki escuelaykipi predicanaykipaq?
4 Allinkunapi yuyaykuy. Manan llapa compañeroykikunachu burlakunqaku. Wakinqa yaqapaschá mana manchakuq kasqaykita reparaspa uyarisunkiku. Mana pipas uyarisunkichu chayqa, ama pisi-kallpayaychu. Jehová Diosqa kusikunmi kallpachakusqaykita rikuspa (Heb. 13:15, 16). Aswanpas mañakushallay ‘mana manchakuspa’ rimanaykipaq (Hech. 4:29; 2 Tim. 1:7, 8). Hinaspapas kusisqan sientekunki pipas uyarisuqtiyki, yaqapaschá chay runaqa Diosta serviq kapunman.