¿Hayk’aqmi kutina Diosmanta yachay munaqkunaman?
1. ¿Imatan ruwananchis hukkunaman yachachinapaq?
1 Hukkunaman Diospa Gobiernonmanta yachachinapaqqa kutinanchismi tukuy sonqomanta yachay munaqkunaman (Mat. 28:19, 20). Chayta ruwanapaqqa manan unay tiempochu pasanan, chaypaqmi yachay munaqpas yachachiqpas allinta tiemponkuta qhawarinanku. ¿Imarayku?
2, 3. ¿Imaraykun kallpachakunanchis usqhaylla kutinapaq?
2 ¿Imaraykun usqhaylla kutinanchis? Diospa Gobiernonmanta ‘allin willakuykuna’ willayqa ñan tukukunqaña, millay runakunaq tukukunanpaqpas pisi tiempollañan kashan (Mat. 24:14; 1 Ped. 4:7). Chaywanpas, kashanraqmi ‘qespichina p’unchay’ yachay munaqkunapaq. Chayraykun Diospa ‘siminta willamunanchis’, yachay munaqkunamanpas usqhaylla kutinanchis, chhaynapi Diosmanta astawan yachanankupaq (2 Cor. 6:1, 2; 2 Tim. 4:2).
3 Saqraqa makillan kashan yachay munaqkunaq sonqonmanta Diospa siminta chinkachinanpaq (Mar. 4:14, 15). Wakinqa manañan yachayta munankuchu familianku, llank’aqmasinku otaq hukkunapas burlakuqtinku. Chayraykun usqhaylla kutinanchis kallpachamunanchispaq, manaraq sonqonpi yachay munasqan chinkapushaqtin. Pisi tiempollamanta kutisun chayqa, manan sasachu kanqa wakmanta paykunawan parlariy.
4. ¿Imatan ruwananchis yachay munaqkunaman kutinapaq?
4 Willananchismi hayk’aqchus kutinanchista: Rimasqanchis p’unchaymantapachan ninanchis ima p’unchaychus ima horachus kutisun chayta. Hinallataq huk tapuyta saqemunanchis kutispa chaymanta rimanapaq. Tiemponchista qhawarispan yachay munaqta nisunman paqaristin otaq chay qhepallaman kutinanchispaq. Sichus sabadopi otaq domingopi predicarqanchis manataq huk p’unchaykunapi tiempon kanchu chayqa, nisunmanmi: “Chay hinaqa kunan hinata kutimusaq”, nispa. Chaypaqmi ichaqa, allinta anotananchis maypi tiyasqanta ima p’unchay ima hora kutisun chaytapas, hunt’ananchistaqmi nisqanchista (Mat. 5:37).
5. Yachay munaqkunaman usqhaylla kutispan Jesuspa kamachiwasqanchista hunt’anchis, ¿imaraykun chayta ninchis?
5 “Pisi tiempollañan kashan” kay pachapi millay kawsay tukukunanpaq, chayraykun yachay munaqkunata tarispaqa pisi tiempollamanta kutinanchis. Chaypaqmi willananchis ima p’unchaychus ima horachus kutinanchispaq (1 Cor. 7:29). Chayta ruwasunchis chayqa astawanmi mast’arikunqa Diospa Siminmanta allin willakuykuna.