Tapuykuna

◼ ¿Jehová Diospa testigonkuna rakinankuchu grabasqa otaq copiasqa discursokunata?

Bibliamanta discursokunaqa kallpachawanchismi (Hech. 15:32). Chayraykun munasunman chay discursota mana uyariqkuna yachanankuta. Kunanqa askha artefactokunan kan grabanapaq, chaymi atikun huk discurso grabayta, chayta ratulla hukkunaman rakiytapas. Wakinqa askha grabasqa discursokunatan hap’inku, wakintaqa unayña grabasqata, chaytan mañanku otaq amigonkupaq grabanku. Wakintaq Internetpi discursokunata churanku lliw chayta uyarinankupaq.

Manan hark’asunmanchu pipas paypaq otaq familianpaq discursokuna grabanantaqa. Umallikunapas encargankumanmi onqosqa kaspa mana huñunakuyman riyta atiq iñiqmasikunapaq grabakunanpaq. Ichaqa kanmi allin razonkuna grabasqa otaq copiasqa discursokunata mana lliwman rakinapaq.

Manataq lliwchu yachanku pikunapaq maypichus chay discurso ruwakusqanta chayqa, yaqapaschá pantasqata entiendenkuman wakin yachachikusqanta. Chaymantapas manan sut’itachu yachakunman pichus hayk’aqchus chay discurso qosqanta, chhaynapi chay yachachikuy allin kashasqanpi confianapaq (Luc. 1:1-4). Chaymantapas, copiasqa discursokunata otaq grabacionkunata rakikuqtinqa, wakinmi alabankuman discurso qoqta otaq discurso qoqpas alabakunman (1 Cor. 3:5-7).

Allin yuyayniyoq hunt’aq kamachiqa anchatan llank’an espiritual mikhunata necesitasqanchisman hina “tiempollanpi” qowananchispaq (Luc. 12:42). Chay espiritual mikhunapin tarikun huñunakuykunapi uyarisqanchis discursokuna, hinallataq Internetpi www.pr2711.com nisqapi kaq grabacionkunapas. Allin yuyayniyoq hunt’aq kamachiqa Umalli T’aqanpiwanmi necesitasqanchista qowashallasun iñiyninchispi qaqata sayananchispaq (Hech. 16:4, 5).