17 marzo p’unchaymantan invitacionkunata rakisun
1. ¿Ima ruwaymi 17 p’unchay marzo killapi qallarinqa?
1 Sapa watanmi Jesuspa ‘wañusqanta willashallanchis’ chaymi huk huñunakuyta aparinchis (1 Cor. 11:26). Chayraykun askha runakunata chay huñunakuyman invitamunanchis, chhaynapin paykunapas uyarinqaku salvakunanchispaq Diospa qowasqanchis regalomanta (Juan 3:16). Kay watapiqa 17 marzo p’unchaymantan Jesuspa Wañusqanta Yuyarinapaq invitacionta rakimusun. ¿Ñachu preparakushanchisña chay ruwaypi yanapakunapaq?
2. ¿Imaynatan invitasunman?
2 ¿Imaynatan invitacionta qosunman? Pisillapin nisunman: “Imaynalla, familiaykiwan kuska ancha importante huñunakuyman hamunaykipaqmi huk invitacionta saqeyta munayki, chay huñunakuyqa teqsimuyuntinpin kanqa 5 abril p’unchaypi. Huk discursopin sut’inchakunqa imakunas Jesuspa wañusqanrayku kasqanta, kunanpas imatas ruwashan chaytapas. Chaymanqa gratisllan haykuwaq. Kaypin willakushan maypichus aparikunanta, imay horaschus kanqa chaytawan”, nispa. Sapa semana tukuytapas necesitakusqanman hinan revistakunata munachikunqa.
3. ¿Imaynatan yanapakusunman llapa runakunata invitamunapaq?
3 Llapa runakunata invitamuy. Llaqtantinpas hamunankutan munanchis. Chaymi llapa runakunata invitamunchis: familianchista, estudiantekunata, revisitanchiskunata, vecinonchiskunata, llank’anapi otaq escuelapi compañeronchiskunata, huk reqsisqanchis runakunatapas. Hinaspapas umallikunan tiyasqanchis cheqaspi invitacionkuna rakikunanpaq allinta qhawarinqaku. Ñawpa watakunaqa ancha allinmi chay ruwayqa karqan. Qayna wata huñunakuyninchismanmi huk warmi hamurqan, acomodador rikuspataq nirqan: “Invitamuqniykita maskhaysisayki”, nispa. Chay warmiqa manan pitapas reqsisqachu, chay p’unchayllan wasin-wasinta invitacionkunata rakimuq iñiqmasinchis saqemusqa.
4. ¿Imaraykun tukuy sonqo invitacionkunata rakimunanchis?
4 Yaqapaschá invitacionta saqemusqayki runa hamunqa. Manaña hamunkumanchu chaypas, chay ruwaypi tukuy sonqo yanapakusqaykiqa ancha allinmi kanqa. Invitacionkuna rakimusqaykiqa atiyniyoq kamachikuqninchis Jesús Rey kasqantan willanqa. Hinaspapas sut’itan rikuchinki llapa runakunaman, iñiqmasinchiskunaman astawanqa Jehová Diosninchisman salvakunanchispaq qowasqanchis regalota ancha chaninpaq qhawarisqaykita (Col. 3:15).