Allinta predicanapaq yanapaykuna
1. ¿Imakunapin chay yachachikuy yanapawanchis?
1 Qhawaq revistapin mayninpi lloqsimun “Jehová Diospa testigonkunawan rimaspa” nisqa yachachikuy. Chayqa ruwasqa kashan runakuna uyarinanpaq hinan, chaymantapas sumaqllata yachachinanchispaqmi yanapawanchis (1 Ped. 3:15). Qhawarisun imaynatan yanapachikusunman chay yachachikuykunawan chayta.
2. ¿Hayk’aqmi chay yachachikuykunawan yanapachikusunman?
2 Allinpunin predicanapaq. Chay yachachikuykunaqa Qhawaq revistapin lloqsimun, chaymi allinpuni kanman chay revistakunata waqaychay. Chhaynapi predicasqanchis runakuna, estudiantekunapas ima yachachikuymanta tapuwaqtinchisqa, chay revistata munachisunman otaq kuska t’aqwirisunman. Sichus chay revistayki mana kanchu chayqa Internetpin jw.org. nisqamanta horqowaq.
3. ¿Imaynatan chay yachachikuykunawan yanapachikusunman?
3 ¿Imaynatan yanapachikusunman chay yachachikuywan? Predicaqmi chay revistapi Testigoq rimasqanta leenman, runaq kutichisqantataq chay yachachikuymanta yachayta munaq runa leenman. Chay hinata ruwaspan runakunaqa sumaqllata entiendenqaku Bibliaq yachachisqanta (Deut. 32:2).
4. ¿Imatan yachasunman chay yachachikuymanta?
4 Allinpunin yachananchispaq yachachinanchispaqpas. Chay yachachikuykunata leespaqa kaykunatan qhawarisunman: ima textokuna utilizasqanta, ima rikch’anachiykuna ruwasqanta, imayna simiwan rimasqantapas. Kallpachakunanchistaq chay hinata predicananchispaq (Prov. 1:5; 9:9). Huk iñiqmasinchismi nirqan: “Chay yachachikuykunata leespan repararqani allin preparasqa precursorpas chaykunata kutichishanman hinata”, nispa.
5. ¿Imaynatan estudiantenchiskunata yanapasunman chay yachachikuykunawan?
5 Chay yachachikuykunawanqa estudiantenchiskunatapas yanapasunmanmi predicayta yachanankupaq. Paykunawanmi leesunman, hinaspa payta nisunman chay revistapi predicaqmanta ruwananpaq. Chayta ruwaspan yachanqaku hukkunaman respetowan sumaqllata predicayta (Col. 4:6). Qhawarisqanchis hina Jehová Diosqa imaymana yanapaykunatan qowanchis allinta predicananchispaq (2 Tim. 4:5).