¿Predicashankichu Qhawaq revistapi kaq yachachikuykunawan?
1 2008 wata 1 de enero Qhawaq revistata leespan huk cristianamasinchis niran: “Predicaytapunin munashani kay revistawan”, nispa. Qhawaq revistapiqa askha allin yachachikuykunan kan predicanapaq. 2009 wata enero killamantataq huk mosoq Qhawaq revista lloqsimunqa, sapa kinsa killamanta; chay revistaqa predicanallapaqmi kanqa. ¿Imaynatan chay revistapi kaq yachachikuykunawan predicasunman?
2 “Jesuspa yachachiyninkuna”: Kay t’aqapi yachachikuymi yanapawasunman Bibliamanta estudiachiyta qallarinapaq. ¿Imaynatan chayta ruwasunman? Predicasqanchis runaman qhawachisun kay yachachikuypa titulonta, hinaspa qhawachillasuntaq ñawpaq parrafopi Jesuspa nisqanta. Astawan yachay munasqanta reparaspaqa, qhawachiy parrafokunaq hawanpi kaq tapuykunata, chay tapuykunaqa yuyaymanachinapaqmi churasqa kashan. Chaymanta tapuy: “¿Imaninkin kay tapuymanta?”, nispa; kutichisqanta uyarispataq, qhawachiy mayqen dibujokunan chay parrafoq nisqanwan tupan chayta, hinaspa qatiqnin parrafotañataq qhawaychis. Ichaqa ama llapan parrafokunatachu qhawachiy, aswanpas kuskankamalla, hukpiña kutispa tukupaykunki. Kutinaykipaqqa ¿Imatapunin Biblia yachachin? nisqa librowan estudiachiyta qallarinaykipaq allinta preparakuy.
3 “Familiakunapaq sumaq yachachiykuna”: Kay t’aqapi yachachikuymi casadokunata tayta mamakunatapas yanapanman Bibliaq nisqanman hina familiankupi ima phiñachinakuytapas, ima mana allintapas allichanankupaq, chhaynapi sumaqta kawsanankupaq. “Familiakunapaq sumaq yachachiykuna” nisqaqa mana Testigo kaqkunatapas reparachinmanmi Bibliaq yachachisqan ancha allinpuni kasqanta (2 Tim. 3:16, 17).
4 Wayna sipaskunapaq yachachikuykuna: “Wayna sipaskunaq yachananpaq” nisqa t’aqapiqa wayna sipaskuna allinta t’aqwinkuman Bibliaq willakuyninkunata, chay yachasqankumantapas qelqankuman. Predicashaspaqa kaywanmi wayna sipaskunata rikuchisunman Diospa Simin Qelqa estudiay allinninkupaq kasqanta (Sal. 119:9, 105). Kallanqataqmi “Tayta mamakuna wawankuta yachachinankupaq” nisqa t’aqapas; kaywanmi tayta mamakuna wawankuta yachachinkuman ñawpaq tiempopi Dios serviq runakunamanta. ¿Kallpachakunkichu wawaykikunawan kuska estudianaykipaq?
5 Huk yachachikuykunapas kanqa: “Kay revista leeqkunaq tapukuynin” nisqa t’aqapi kutichikunqa mana Jehová Diospa testigonkunaq huk tapukuyninkuta. Chaytaqa wasin wasinta predicaspan qhawachisunman. Kallanqataqmi “[Huk llaqtamanta apachimusqanku] carta” nisqa t’aqapas, chaypin iñiqmasinchiskuna, wakin misionerokunapas willakunku ima sasachakuykunata atipanku predicanankupaq chayta. Chay willakuykunata leespan allin uyarikuq runakuna yachanqaku teqsimuyuntinpi allin willakuykuna predicakusqanta, chay rikuchin Jesús runakunawanña mana rikuylla kashasqanta (Mat. 24:3, 14).
6 “Diosman asuykuy” nisqa t’aqapi yachachikuyqa allin sonqoyoq runakunatan kallpachan Jehová Diosmanta astawan yachanankupaq; chayqa semanapaq Biblia leesqanchismantan horqokun. “Allin iñiyniyoq runakunamanta” nisqa t’aqapi yachachikuyqa runakunata yanapanqa rikushankumanpas hina Bibliaq willasqanta leenankupaq, kay t’aqapin Bibliaq willasqan hina willakun imakunata wakin runakuna ñawpaq tiempopi ruwasqankuta, imaynapi tarikusqankuta, imayna iñiyniyoq kasqankutapas.
7 ¡Maytapunin kusikunchis Qhawaq revistapi predicanapaq yachachikuykuna sapa killa lloqsimusqanmanta! ¡Maytapuni kusikullasuntaq pisi tiempollamanta, sapa kinsa killamanta, predicanallapaq mosoq Qhawaq revista lloqsimuqtin! Chay hinaqa, kallpachakusunchis Qhawaq revistata llapanta leenanchispaq, chhaynapin allinta predicasun.